ҚазАқпарат — Зауытбек Тұрысбеков Дүниежүзі қазақтары қауымдастығы төрағасының бірінші орынбасары болып сайланды. Оның кандидатурасын Дүниежүзі қазақтарының V құрылтайында Елбасы Нұрсұлтан Назарбаев ұсынды, деп хабарлайды ҚазАқпарат. «Енді біз Төрағаның бірінші орынбасарын сайлауымыз керек. Жанымда отырған Талғат Мамашов 2004 жылдан бастап атқарып келеді. Біраз жұмыс істелді. Сырттағы отандастарымызбен рухани-мәдени байланыстар нығая түсті», — деген Мемлекет басшысы Талғат Мамашовқа жемісті жұмысы үшін ризашылығын білдірді.
«Мен енді осы орынға Зауытбек Тұрысбековты ұсынғым келеді. Тәуелсіздік жылдары ішінде менің тапсырмаммен талай жауапты қызметтері атқарды. Ысылған, тәжірибелі. Кезінде қазақтың Көші-қон демография агенттігін басқарды. Облыста әкім, Ішкі істер министрі болды. Мемлекеттік қызмет істері агенттігін басқарды. Ең негізгісі қандастарымыздың ең көп тұратын Ресей мен Өзбекстанда Елші болды. Олардың жағдайын жақсы біледі», — деді Қазақстан Президенті. Тұрысбековтің кандидатурасын құрылтай делегаттары бірауыздан қолдап дауыс берді. «Сенім артқандарыңызға көп рахмет. Бұл қызмет әр қазақ үшін бөлек дүние. Мен көп сөйлемеймін, істің жайын жақсы білем. Барлығын іспен ғана дәлелдегім келеді», — деді Төрағаның жаңа бірінші орынбасары өз кезегінде.
ҚазАқпарат