ҚР президенті Нұрсұлтан Назарбаев Қазақтардың Дүниежүзілік қауымдастығының басшылығына қайта сайланды, деп хабарлады агенттік тілшісі.
Қазақтардың дүниежүзілік V құрылтайында ашық дауыс берудің нәтижесінде мемлекет басшысын Қауымдастықтың президиум төрағасы етіп қайта сайлады. Өзінің орынбасары ретінде Қазақстан президенті Зауытбек Тұрысбековты ұсынды.
«Тәуелсіздік жылдары ол (З. Тұрысбеков – ҚазТАГ) көптеген жауапты қызметтерде өзін жақсы жағынан танытты, ол тәжірибелі адам. Кезінде ол көші-қон және демография агенттігін басқарған, қазақтардың отанына көшіп келуіне жауапты болған, Оңтүстік Қазақстан облысының әкімі, ішкі істер министрі болды, мемлекеттік қызмет істері агенттігін басқарды, ең бастысы — ол Өзбекстан мен Ресейде елші қызметін атқарды. Ал оларда қазақтардың ең көбі мекен етеді», — деді Н. Назарбаев.
Дауыс беру нәтижесінде З. Тұрысбековтың кандидатурасы Қазақтардың дүниежүзілік қауымдастығының төраға орынбасарлығына бекітілді.
Қазақстардың дүниежүзілік қауымдастығы (ҚДҚ) немесе Дүниежүзілік қазақтардың қоғамдастығы – 1992 жылы 29 қыркүйекте қазақтардың І Дүниежүзілік құрылтайының шешімімен құрылған халықаралық мемлекеттік емес республикалық мәндегі ұйым. Қазақтардың дүниежүзілік төрт құрылтайында Н. Назарбаев қауымдастық басшысы болып сайланған.
Қауымдастықтың әлемнің 19 елінде бөлімшелері мен өкілдіктері бар. Ұйымның негізгі мақсаты – шетелдегі отандастырмен рухани-мәдени даму, білім мен бизнес мәселесінде байланысты қолдап отыру.
ҚазТАГ
