Оңтүстік Қазақстан облысы, Мақтарал ауданындағы тоғызыншы сынып оқушыларының куәліктеріне жалған бағалар қойылған. Бұл туралы Фердоуси тәжік мектебінің директоры болып жаңадан тағайындалған Жанар Мамырова мәлімдеді. Ол мектептің бұрынғы басшылығы жіберген қателіктерді бейнежазбаға түсіріп, Уoutube-та жариялады, деп хабарлайды ҚазАқпарат ХАА тілшісі.
Жанар Мамырованың сөзінше, Фердоуси мектебінде 9-сыныпты аяқтаған 18 оқушының мектепті бітіру туралы куәлігіне бағалар өзгертіліп қойылған. Бұл кемшіліктерді ол бұрынғы директордан құжаттарды қабылдап алған кезде анықтағанын айтады. Яғни, аттестатта жазылған бағалар мен мектеп журналындағы бағалар екі түрлі болып шыққан. Олардың басым бөлігінде бағалар көтермеленіп қойған.
«1 немесе 2 куәлікте қате кетсе, оған техникалық қателік деп қарар едім. Себебі, 12 жылдан бері мектеп директоры болып істеп келемін. Бірақ жіберілген мына қателіктерді көріп, мұншалықты сорақылықты көрмеппін деп айтар едім. Мысалы, Мырзашарипов Хаджимахмадтың құжатын алып қарасақ, журналда қазақ, тәжік әдебиеттерінен 3 деген баға қойылса, куәлікке 4 түсіп тұр. Одан кейін сызу, дене шынықтыру, орыс тілі сияқты, барлығы 10 пәнде бағалар өзгертілген. Оның ішінде 7 пәннің бағасы 3 деген бағадан 4-ке өзгертілген.Қазір менің алдымда 18 куәлік тұр, соның барлығында бағалар көтермеленіп қойылған»,-дейді жаңа директор.
Ол бұл құжаттардың қателіктерін аудандық білім бөлімінің басшылығына жеткізбек болғанымен, Лесхан Қойлыбаевтың қабылдауына кіре алмағанын айтады. Айта кетейік, Жанар Мамырова бұл қызметке сол аудандық білім бөлімінің басшысы Лесхан Қойлыбаевпен соттасып жүріп, қайта тағайындалған болатын.
Енді Мамырова құжаттарды мұқият тексеріп шығып, құзырлы органдарға тапсыруға бекініп отыр.
Бұл мәселеге орай аудандық білім бөлімінің басшысы Лесхан Қойлыбаев қандай да бір жауап қатпады, ол ауданда Ұлттық бірыңғай тестілеу өтіп жатқандығын алға тартты.
Дереккөз: inform.kz
