ҚазАқпарат — Биыл рәміздеріміз — Мемлекеттік Ту мен Елтаңбаның қабылданғанына 25 жыл толады. Мерейлі күн қарсаңында, ҚР Ұлттық кітапханасында «Тәуелсіздік рәміздері» атты кітап-құжаттық көрме ашылды, деп хабарлайды «ҚазАқпарат» ХАА тілшісі.
Көрме Мемлекеттік Туға, Елтаңбаға және Әнұранға арналған үш бөлімнен тұрады. Онда мемлекеттік рәміздердің туу тарихы, авторлардың өмірбаяны, егемендікке дейінгі тарихи рәміздер туралы құжаттық материалдар қойылған.
Салтанатты ашылуға қатысқан ҚР Мемлекеттік Елтаңбасының авторы Жандарбек Мәлібеков рәміздердің қадір-қасиетін ұғыну қажеттігін баса айтты.
«Елтаңбатану» деген бағыт болу керек. Өйткені қазір Елтаңбаны бір фирманың логотипі ретінде қабылдап жүрміз. Шын мәнінде Елтаңбада қазақ халқының ертеден келе жатқан мұң-мұқтажы, тарихы, дәстүрі көрсетілген. Халықтар достығы шаңырақ пен уықтар арқылы көрсетілген. Оны көпшілік біле бермейді. Елімізде рәміздерді өскелең ұрпаққа насихаттауға, таныстырып жүруге үнемі мүмкіндік жасалса игі. Әрбір мемлекеттік рәміз біздің бойтұмарымызға айналуы тиіс», — деді Елтаңба авторы.
Айта кетейік, көрме жұмысы жаңа материалдармен толықтырырыла отырып, 10 тамызға дейін жалғасады.
Дереккөз: inform.kz
