Қазақстанда технологиялардың дамуына байланысты нотариалдық қызмет те азая бермек. Бұл туралы Нотариат және адвокатура институттарын дамыту және реформалау мәселелеріне арналған Үкімет сағатында ҚР Әдiлет министрi Марат Бекетаев айтты, деп хабарлайды Baq.kz тiлшiсi.
«Қазiргi таңда нотариустар көрсететiн қызмет сапасы бiршама артқан. Мысалы, бұрын нотариусты нотариалдық қызмет көрсету үшiн үйге немесе кеңсеге шақыру үшiн оған көлiк жiберiп, қосымша ақы төлеп, оның тағы басқа көптеген тiлектерiн орындау қажет болатын. Ал қазiр олай емес. Бүгiн нотариустар бiр-бiрiмен өзара бәсекелес. Қазiргi таңда әдiлет органдары неге нотариустарды жиi тексермейдi? Себебi, технологиялардың дамуы мен е-нотариаттың енгiзiлуiне байланысты бұрынғыдай жиi тексерудiң қажетi жоқ. Яғни, барлығын электрондық жүйеден қарап алуға болады. Орталық серверде тiркелмеген нотариалдық әрекеттер күшiне енбейдi. Жеке пiкiрiмдi айтсам, мен Қазақстанда нотариалдық қызмет азайып барады деп ойлаймын. Нотариустар ренжiмесiн, бiрақ бұдан қашып құтыла алмаймыз. Технологиялардың дамуына байланысты нотариалдық қызмет те азая бередi. Жалпы, нотариалдық қызмет дегенiмiз не? Ол қандай да бiр оқиғалар мен фактiлердi куәландыру, растау. Ал қазiр нотариусты шақырғаннан видео түсiре салған арзан. Бұндай технологиялар одан әрi дами бередi. Бiздiң азаматтық-құқықтық айналымда технологиялар одан әрi көп пайдаланыла бермек», — дедi Мәжiлiс үйiнде Бекетаев.
Министрдiң айтуынша, екiншiден, қазiргi таңда елiмiзде көптеген рәсiмдер жеңiлдетiлдi. Бүгiнгi күнi құжат көшiрмелерi мен басқа әрекеттердi нотариалдық растау бұрынғыдай жиi талап етiлмейдi.
«Менiң ойымша, бүкiл әлемде нотариалдық қызмет көлемi азайып барады», — деп түйiндедi Әдiлет министрi.
Атап өтсек, Үкімет сағатына парламентшілер, Жоғарғы Сот, Бас прокуратура, әділет, қаржы, ұлттық экономика министрліктері мен басқа да мүдделі мемлекеттік орган өкілдері, сондай-ақ нотариат және адвокат қоғамдастықтарының, «Атамекен» ұлттық кәсіпкерлер палатасының өкілдері, ғалымдар мен сарапшылар қатысты.
Дереккөз: Baq.kz
