Жаймашуақ жаздың жарқын күндеріне аяқ басар тұстағы Қазақстан халқының бірлігі күні – Шымкент қаласының Әл-Фараби алаңында тойланды. Таңертеңнен қала жұртын әуезді әнімен оятқан мерекелік концерт Орыс драма театрының алдындағы дайындықтан басталды. Күн шуағын төккен бүінгі күн келуші көпшілікке нұрын сыйласа, Оңтүстік өнерпаздары жырдан шашу шашып, күмбірлеген күймен тербеді.
Иә, қауіпсіздік пен тұрақтылық, бейбітшілік пен келісім — ең басты байлығымыз. Біз тәуелсіздігіміздің тірегі болған бұл құндылықтарды көздің қарашығындай сақтауымыз қажет. Тәрбие мен тағлымның бастауы болар 1000 домбырашының орындаған күйі талайды тамсандырса, Елбасы айтқан рухани жаңғыруға шымкенттіктер бүгінгі мерекеде үлес қоса отырып, ұлтымыздың қасиетін танытты.
Оңтүстік Қазақстанда 100-ден астам этнос өкілдері тату — тәтті ғұмыр кешуде. Бірлік пен татулықтың бастауы болар игілікті шараның өскелең ұрпақ үшін мәні мен маңызы зор. Тәуелсіздігіміздің баянды болуы бүгінгі іс-әрекетімізден көрінсе, жүректере себілген рухани тәрбие ғұмырымызға азық болмақ. Айта кетейік, мерекелік шарада этносаралық татулық пен қоғамдық-саяси тұрақтылықты сақтауға сүбелі үлес қосқан өңірдегі 18 этномәдени бірлестікке облыс әкімінің «Бауырмал» сыйлығы табысталды.
Көрерменнің көзайымына айналған салт-алттылар шеруі мерекелік шараның көрінісін қыздыра түсті. Өйткені, аттың құлағында ойнайтын шабандоздардың бұл өнерді меңгеруі салт-дәстүрімізді жаңғыртуға сеп болмақ. Әрине, тұлпарды тізгіндеу кез-келгеннің қолынан келе бермейді.
«Күшті ұлт болу үшін — алдымен ішкі бірлік, ұйымшылдық пен татулық қажет»,- деген Елбасы Нұрсұлтан Назарбаев осы байлығымызды қадірлей білу, оны жас ұрпақтың жүрегіне ұялату — Отанымыздың жарқын болашағының кепілі екендігін айтады.
Салтанат Тойболова
