2017 жылғы 26 сәуірде Астана қаласында консулдық мәселелер жөніндегі Қазақстан-Корея консультацияларының 4-раунды өтті.
Консультациялар барысында тараптар екі ел аумақтарына азаматтардың кіру/шығу және болу тәртібі, заңсыз еңбек миграциясының алдын алу, экстрадиция және сотталған адамдарды беру, сондай-ақ басқа да өзара мүдделілік білдіретін мәселелер талқыланды. Өткізілген келіссөздердің негізгі тақырыптарының арасында Корея Республикасына туризм, іскерлік, емделу мақсаттарымен келген қазақстандық азаматтарды депортациялау оқиғаларының жиіленуі болды. Сеулден келген жоғары делегация Корея иммиграциялық қызметтерінің елге кіргізбеу туралы фактілердің жиілеуі, сонымен қатар, депортацияға және қаржылық шығындар мен моралдық-психологиялық зардап шеккен ҚР азаматтары тарапынан түскен шағымдар санының өсуі, олардың құқықтарының бұзылуы мен бостандықтарының шектелуі жөнінде ақпараттандырылды. Корея дипломаттары қалыптасқан жағдайға түсінгендік танытып, жақын арада Сеулде осы мәселені шешу бойынша өз елінің көші-қон қызметтерімен ведомствоаралық консультациялар өткізуге уәде берді. Сонымен бірге, жаппай депортациялау себептерінің қатарында Кореяға заңсыз жұмыс істеу мақсатымен визасыз режимді пайдаланып келетін қазақстандықтар санының өсуі атап өтілді. Келіссөздер сындарлы жағдайда және өзара түсінушілік рухында өтті.
Ақпарат көзі: Egemen.kz
