Бүгін Оңтүстік Қазақстан облысының Ішкі істер департаментінде Қазақстан полициясының 25 жылдығына орай ішкі істер органдары қызметкерлері арасында «Парасатты полицей — 2017» шығармашылық байқауы өтті. Аталған байқау дәстүрлі түрде жыл сайын өткізіліп тұрады. Іс-шараның мақсаты – ішкі істер органы қызметкерлері арасында мемлекеттік тілді насихаттау, Отанға деген сүйіспеншілікті арттыру, сондай-ақ мемлекеттік тілдің қолдынылу аясын кеңейту.
Байқауға қала, ауданнан келген 16 командадан тұратын 100-ге жуық қызметкер қатысты. Тәртіп сақшылары өздерінің сегіз қырлы, бір сырлы екенін танытып, өздерінің білімдерімен қатар, әртістік өнерлерін көрсетіп, мемлекеттік тілде еркін ойларын жеткізіп, өнерлерін ортаға салды.
Байқау 3 кезеңнен тұрды. Бірінші кезеңде әрбір команда өздерін таныстырып өтті. «Өнерлі полицей» деп аталатын келесі кезеңінде дайындап келген үй тапсырмаларын көрсетті. Онда ән мен билерін орындап, сахналық қойылымдар қоюмен қатар, бейнероликтерін көрсетті. Ал байқаудың соңғы кезеңінде екі кезең бойынша іріктеліп шыққан командалардың капитандары шығып, шығармашылық қабілеттері мен жаңалықтарын ортаға салды.
Тартысты өткен байқаудың қорытындысы бойынша қазылар алқасы «Бас жүлдені» Шымкент ҚІІБ-ның Еңбекші ПБ «Қақпан» командасына берді. Бірінші орынды — Шымкент ҚІІБ ЖПҚ жол-патрульдік полиция полкінің «Жол періштелері» командасы иеленді. Екінші орынға Төлеби АІІБ мен Әл-Фараби ПБ тұрақтады. Ал үшінші орынды – Қаратау ПБ мен Арыс АІІБ иемденді.
Сонымен қатар, жеңімпаздарды 5 номинация бойынша бағалады:
«Ұйымшыл команда» — Түлкібас АІІБ;
«Өнерлі полицей» — Сайрам АІІБ;
«Тапқыр команда » — Кентау ҚІІБ;
«Үздік капитан» — Шымкент ҚІІБ Еңбекші ПБ «Қақпан» командасының капитаны полиция капитаны Мамиров Қуаныш иеленді.
Ал «Көрермен көзайымы» номинациясы ең жас өнерпаз Төлеби АІІБ атынан келген 7 жастағы Кәусар Қуанышқызы алды. Қазығұрт ауданы ішкі істер бөлімінің командасы да белсене қатысқаны үшін марапатталды. Өзге де белсене қатысқан командаларға, мәселен грамоталар табысталды.
«Парасатты полицей — 2017» байқауының барлық жеңімпаздарына арнайы дипломдар мен бағалы сыйлықтар ұсынылды. Іс-шара соңы көңілді концертке ұласты.
ОҚО ІІД баспасөз қызметі
