«ТҮРКСОЙ» Халықаралық ұйымы, Оңтүстік Қазақстан облысының әкімдігі және ҚР Мәдениет және спорт министрлігі бірлесіп бекіткен іс-шаралар жоспарына сәйкес 21 наурыз күніне белгіленген Түркістан қаласында «Түркістан — Түркі әлемінің мәдени астанасы» жылының салтанатты шарасы бастау алды.
Киелі шаһардағы Ұлы тойда алғаш болып сөз алған ОҚО-ның әкімі Жансейіт Түймебаев бірлігі мен ынтымағы жарасқан барша туысқан түркі халықтарды әз-Наурыз мерекесімен құттықтап, «Наурызнама» іс-шарасын салтанатты түрде ашып берді.
Мұнан кейін, ҚР Мәдениет және спорт министрі Арыстанбек Мұхамедиұлы, ҚР Парламенті Сенатының депутаты Қ.Айтаханов өз құттықтауларын жеткізді.
Әз-Наурыз мерекесіне арналған «Наурызнама» іс-шарасына Өзбекстан, Түркия, Түркіменстан, Қырғызстан, Ресей жəне автономиялық түркі елдерінен 300-ге жуық мәртебелі қонақтар келді. Сондай-ақ, бұл күні киелі шаһардағы Ұлыстың ұлы күнін тамашалауға еліміздің түкпір-түкпірінен келген қонақтар өте көп. Түркі дүниесінің текті төрі болған Түркістанда 30-дан аса ақ қанатты киіз үйлер тігіліп, наурыз көже әзірленіп жатыр.
Қазіргі таңда «Айғақ» телеарнасының басшысы Дулат Әбіш бастаған арнаның бір топ түсірілім тобы көзі қарақты көрерменге жедел әрі шынайы ақпарат жеткізу мақсатында жұмыс жасап жатыр.
«Айғақ-ақпарат».
