ҚР мемлекеттік қызмет істері және сыбайлас жемқорлыққа қарсы іс-қимыл агенттігінің сыбайлас жемқорлыққа қарсы іс-қимыл ұлттық бюросы ҚР инвестициялар және даму министрлігінің геология және жер қойнауын пайдалану комитетінің төрағасы Базарбай Нұрабаевтың басшылығындағы қылмыстық топ жұмысына балта шапты, деп хабарлады Ұлттық бюро баспасөз қызметінен.
«Б.Нұрабаев бүкіл Қазақстан аумағында кәсіпкерлерден жер қойнауын пайдалануға келісімшарт жасағаны үшін жүйелі түрде аса ірі мөлшерде пара алу жөніндегі ауқымды қылмыстық сұлбасын ұйымдастырған», — делінген дүйсенбі күні таратылған хабарда.
Аталған сұлбаға сондай-ақ Б.Нұрабаевтың сенімді тұлғалары – оның орынбасары Н. Құрбанов, «Центрказнедра» және «Южказнедра» РМБ жетекшілері А.Нұржаубай мен Е.Әділханов, «РЦГИ «Казгеоинформ» МБ басшысы А.Утегенов, Маңғыстау облыстық геология инспекциясының жетекшісі Б. Мутан, сондай-ақ комитеттің құрылымдық бөлімшелерінің жетекшілері тартылған.
6 наурызда Б. Нұрбаевты «Ақмола Голд» ЖШС өкілінен жер қойнауын мемлекеттік зерттеуге келісімшарт жасауға септігін тигізу үшін $20 мың мөлшеріндегі кезекті пара алу кезінде ұстады.
Сондай-ақ пара ретінде Б. Нұрабаев пен оның сыныптасы М. Әбдірашов Audi Q7 маркалы автокөлік пен Шымкенттен құны $25 тұратын 3 бөлмелі пәтер алып, оны соңғысының ұлына рәсімдеген.
Сонымен қатар ол «SK Petroleum» ЖШС өкілінен $20 мың алғаны, сондай-ақ басқа да жер қойнауын пайдаланушылардан Шығыс Қазақстан, Жамбыл және Қарағанды облыстарындағы кеніштерге келісімшарт жасауда олардың мүдделерін лоббилегені үшін тауарлық-материалдық құндылықтар алғаны анықталды.
Б. Нұрбаевтың алған параларының жалпы сомасы $100 мыңнан асатын көрінеді.
Ақпарат көзі: ҚазТАГ.
