Кәмелет жасқа толмаған жасөспірімдер арасындағы қылмысты қалай азайтуға болады? Отбасы тәрбиесіннің тірегі — ата-ана мен мемлекеттік органдардың жауапкершілігін қайтсек арттыра аламыз? Бұл сұрақтарға Оңтүстік Қазақстан облысының әкімі Жансейіт Түймебаевтың қатысумен өткен құқық бұзушылық профилактикасы жөніндегі ведомствоаралық комиссия отырысында жауап ізделді. Жиынға облыстық білім, денсаулық сақтау, жастар саясаты мәселелері басқармасы, ата-аналар комитеті, үкіметтік емес ұйым және бұқаралық ақпарат құралдары қатысты. Облыстық Жергілікті полиция қызметі бастығының орынбасары Мұсабек Зұлпыхаров 2016 жылдың қорытындылары бойынша кәмелетке толмағандар арасындағы қылмыс көрсеткішінің көбейгенін мәлімдеді. Мәселен, былтыр кәмелетке толмағандармен жасалған қылмыстар облыста 57,0 пайызға (293-тен 460-қа) өскен. Құқықбұзушылыққа бейім 1089 жасөспірім және 609 қолайсыз отбасы Ішкі істер органының есебіне алыныпты. Өткен жылы кәмелетке толмағандар тарапынан өзіне өзі қол жұмсау оқиғаларының 89 жайты тіркелген. Облыстық білім басқармасы басшысының орынбасары Раушан Ергашова қылмыс жасаған 460 кәмелетке толмағандардың ішінде 91-і жалпы білім беру мектептерінің оқушылары, 369-ы колледждері мен ЖОО студенттері екенін айтты. Сондай ақ, , кәмелеттік жасқа толмай ерте жүктілікке бой алдырған оқушы қыздар саны өткен жылғы көрсеткіш бойынша 8-ге жетті. Олардың 2-і Сарыағаш, 1-і Мақтарал аудандарынан болса, 5-і Шымкент қаласынан. Жұмыссыз жастарды ақылы қоғамдық жұмыстарға тарту, оларды кәсіби даярлықтан өткізу мақсатындағы жұмыстарда да шикіліктер орын алып отыр. Жиын барысында облыс әкімі Жансейіт Қансейітұлы мемлекеттік органдардың қызметін сынға алып, олардың нәтижелі жұмыс жасауын талап етті. «Бұл мәселелерді шешуге жастар ұйымдарын тартып, ерікті сақшылар отрядтары мен халық жасақшыларының белсенділігін арттыру қажет. Мемлекеттік органдардың арасында өзара қарым-қатынастың жоқ екенін байқап отырмыз. Сондықтан кәмелетке толмағандар арасындағы қылмыстың алдын алу үшін барлық күшті біріктіріп, ата-аналар, педагогтар, мемлекеттік емес ұйымдар және бизнес қауымдастықтарымен бірлесе жұмыс жасауға тиістіміз», — деді Жансейіт Қансейітұлы.
Жиынды қорытындылаған облыс әкімі кәмелетке толмағандар арасында суицидтік көріністерге тосқауыл қойып, жастарды ақылы қоғамдық жұмыстарға көптеп тартыуды, оларға кәсіби білім беруді жауапты органдарға тапсырды. Сондай-ақ, отбасылық-тұрмыстық зорлық-зомбылықтың орын алмауын қадағалауда ұстау керектігін ескертті.
ОҚО әкімдігінің баспасөз қызметі
