Елбасының «100 нақты қадам» Ұлт жоспары аясында халықты жұмыспен қамту, жалпыға ортақ еңбек қоғамы секілді жұмысшы күшін арттыру мәселелеріне басымдық берілген. Сондықтан халқы тығыз Оңтүстік облыстардан Солтүстік Қазақстанға көші-қон ұйымдастыру арқылы азаматтарды жұмыспен қамту негізгі мақсаттардың бірі. Осы орайда, айтулы бастамаға үлес қосушылардың бірі облыстық мәслихат депутаты Жаңабай Ағабеков Сарыағаш ауданында да болып, жергілікті тұрғындарға бағдарламаның негізгі басымдықтарын түсіндірді.
Мемлекет басшысының «Ұлт Жоспары 100 нақты қадамында» жүктелген міндеттер аясында ішкі көші-қон процестерін реттеу және еңбек күші мол аймақтан еңбек күші жетіспейтін республикамыздың солтүстік өңірлеріне Оңтүстік облыстардан өз еркімен ниет білдірген халықты қоныстандыру жұмыстары қарқынды жүргізілуде. Міне осының нәтижесінде бүгінге дейін СҚО-на тек біздің өңірімізден 100-ден астам отбасы көшіп барып, Қызылжар өңірін түлетуге үлестерін қосуда. Ал осы бір маңызды істі жандандырып, әрмен қарай ілгерілету бағытында табанды түрде жұмыс жасап жүрген азаматтардың бірі ОҚО мәслихат депутаты Жаңабай Ағабеков. Халық қалаулысы Солтүстікке қоныстанып еңбек еткісі келген отбасылардың жол шығындарына өз есебінен демеушілік жасап, тіпті өткен жылы өзі көшіріп апарған 50-ге жуық отбасыға сол жақтан баспаналар сатып алып берген.
Тек өткен жылдың өзінде өңіріміздің Сарыағаш, Төлеби, Сайрам, Түлкібас аудандарынан Солтүстікке көшіп барып еңбек етіп жатқан жанұялар баршылық. Айта кету керек, облыс аудандарына қоныс теуіп, тіркелген жанұяларға мемлекет тарапынан қаржылай көмек көрсетіледі. Бұл сома әрбір отбасы иесіне бірнеше а.е.к етіп бекітілген. Ал қоныс саударуға ниетті азаматтардан құжаттар қабылдау, қажетті мамандықтар бойынша мәліметтер беру жұмыстарымен әрбір аудан қалалардағы «Жұмыспен қамту» орталықтары айналысады. Осы орайда жиын барысында Қазығұрт аудандық жұмыспен қамту орталығының мамандары да қаржылай көмек түрлерінің биылғы мөлшеріне тоқталып өтті.
Өткен жылы өңірімізден Солтүстіке қоныс аударған азаматтар саны аз болған жоқ. Айталық, Уалиханов ауданына қарасты бірнеше ауыл округтеріне Оңтүстік аудандарынан көшіп барған 30-дан астам отбасы жайғасып, енді біреулері аз уақыт ішінде бұл жерден кәсіп көзін де ашып үлгерген. Солардың бірі Бауыржан Үсенов болатын. 2016 жылдың тамыз айында Шымкенттен отбасымен бірге Қондыбай елді мекеніне көшіп келген азамат баспанаға қол жеткізіп, бүгінде тасымал кәсібін жандандыру мақсатында еңбек етіп жүр.
СҚО-да бүгінгі таңда ең қажеттісі, шұрайлы өңірдің жерін игеретін ауыл шаруашылығының маманы. Түгін тартсаң майы шығатын, қара топырақты құнарлы жерге терін төккен азамат ұтылмақ емес. Кез келген бау-бақша өнімдері өсіп шығатын аймақ тек қана шаруаның көмегіне зәру. Осы орайда биылғы жылы тек Қазығұрт ауданының өзінен Солтүстікке барып шарушылықпен айналысуға ниет танытып отырған азаматтар саны да аз емес.
Бүгінде жасырын емес, солтүстік өңірлерінде жұмысшы қолы тапшы. Ал Оңтүстікте керісінше халық саны көп. Осыған байланысты өңіраралық байланысты орнатып, ішкі көші-қон арқылы бұл мәселені тиімді шешу жағы басты назарда тұр. Сондықтан қай кезде де аймаққа көшіп барған отбасыларға барынша қолдау көрсетіле бермек.
Абай Омар
