Биыл 1–18 ақпан аралығында Қазақстанның барлық өңірінде ауылдық жерлердің тұрғындарына ауыл шаруашылығы кооперациясының негіздері, ауыл шаруашылығы кооперативтеріне мемлекеттік қолдау көрсетудің жаңа тетіктері туралы түсіндіру жұмыстары жүргізіледі, деп хабарлады ҚР Премьер-Министрінің баспасөз қызметі.
Аталған шара Мемлекет басшысының «Қазақстанның үшінші жаңғыруы: жаһандық бәсекеге қабілеттілік» жолдауында айтылған тапсырмаларын орындау мақсатында жүргізіледі.
Мемлекет басшысы ҚР Ауыл шаруашылығы министрлігіне ауылдағы ауыл шаруашылығы кооперациясына кем дегенде 500 мың ЖҚШ-ты кеңінен тарту міндетін жүктеді.
Түсіндіру жұмыстарын тиісті деңгейде жүргізу үшін Министрлік АШМ қызметкерлерінің құрамы мен ғылыми ұйымдардың өкілдерінен сарапшылар тобын құрды. Осындай семинарлардың басты міндеті — ауыл халқының әрбір тұрғынына ауыл шаруашылығы кооперациясын құру негіздері туралы ақпарат беру.
Көшпелі тренингтер аясында тиісті инфрақұрылымның бар екенін анықтау, өңдеуші кәсіпорындармен, өткізу нарығымен өзара байланысты айқындау және т.б. мақсатта құрылған кооперативтердің мониторингі жүргізіледі. Сонымен қатар, міндеттерді іске асыру үшін ауыл шаруашылығы кооперациясы бойынша бірыңғай ақпараттық-анықтамалық call-орталық қызмет көрсетеді (барлық бағыттардан қоңыраулар шалу тегін).
8 8000 80 80 10 нөмірі бойынша Қазақстанның кез-келген тұрғыны ауыл шаруашылығы кооперативін құру туралы, кооперативтерге мемлекеттік қолдаудың түрлері, қаржыландыру шаралары, кооператив қатысушыларына арналған артықшылықтар жөніндегі сұрақтарына жауап, кеңес ала алады.
Семинарлар, тренингтер өткізу туралы толық мәлімет пен қажетті ақпаратты ҚР АШМ (mgov.kz) мен Агробіліктілік орталығының (fermers.kz) ресми сайтынан алуға болады.
Фото: jurist-for-you77.ru
