Енді Ұлттық бірыңғай тестілеу екі кезеңге бөлінетін болады: қорытынды аттестаттау – мектепті бітіру емтиханы және ҰБТ – ЖОО-ға түсу емтиханы ретінде бөлек өткізілмек, деп хабарлайды ҚР Премьер-Министрінің баспасөз қызметі.
«ҚР Білім және ғылым министрлігі қоғамдық пікірді білудің әлеуметтік сауалнамасын жүргізді. Оған шамамен 10 мың мұғалім, ата-ана, түлектер мен ҮЕҰ қатысып, нәтижесінде ҰБТ-ға қатысты маңызды проблемаларды анықтауға септігін тигізді. ҰБТ өткізу тәжірибесі бойынша, қоғам ҰБТ-ны тек қана жоғары оқу орнына түсу емтиханы ретінде қабылдағаны анықталды. ҰБТ енгізілген алғашқы жылдан бастап, қорытынды аттестаттау функциясы толық орындалып жатқан жоқ. Тестілеуге ешқашан жүз пайыз түлек қатысқан емес. Жыл сайын оған қатыспайтын балалардың саны 30%-ға жетіп артуда. Бұл ҰБТ қорытындысы бойынша Қазақстандағы орта білім беру сапасы туралы түйін шығаруға болмайтынын білдіреді», — деп мәлімдеді ҚР БҒМ Білім және ғылым саласында бақылау комитеті төрағасының орынбасары Нұрбек Оршыбеков ОКҚ-дегі баспасөз конференциясында.
Оның айтуынша, осыған орай министрлік екі бағыт бойынша жұмыс жүргізді: бұл емтихандардың 2-ге бөлінуі, яғни мектеп бітіру емтиханы және ЖОО-ға түсу емтиханы ретінде ҰБТ тапсыру. Сондай-ақ, мемлекеттік гранттарды тағайындау жүйесі ретінде қалдыру; ҰБТ-ның өз құрылымы.
«Нәтижесінде, министрлік ҰБТ-ны екі кезеңге бөлу туралы шешім қабылдады: қорытынды аттестаттау – мектепті бітіру емтиханы, ал ҰБТ – ЖОО-ға түсу емтиханы ретінде бөлек өткізілмек. Қорытынды аттестаттау мектептерде бес пән бойынша, оның 4 – міндетті және 1 – таңдау бойынша өтеді. Мектептерде осындай емтихандар қазіргі уақытта да өткізіліп келеді – оны ҰБТ-ға бармайтындар тапсырады. Сондықтан да мұнда ешқандай ерекше жаңашылдық жоқ. Барлығы мұғалімдер мен оқушыларға мәлім. Атап өтерлік өзгеріс – бұрын тест сұрақтарын облыстық білім басқармалары дайындаса, енді бұл міндет Ұлттық тестілеу орталығына жүктелмек», — деді Н. Оршыбеков.
Бұдан өзге, «Алтын белгi» беруді мектептердің өздері жүзеге асыратын болады. ҰБТ-да «Алтын белгiні» растау қажет етілмейді.
«2017 жылғы ҰБТ форматы бойынша 120 сұрақ болады деп шамалануда. Барлық сұрақтар бес пән бойынша ескеріледі, оның 3-і міндетті және 2-і бейінді пән бойынша талапкердің ЖОО-ға тапсыратын мамандығына байланысты болады. Тестілеу уақыты 3 сағат 30 минутты құрайды. Белгіленіп отырған төменгі шекті деңгей де өзгеріссіз қалады – 50 балл», — деді ол.
Осылайша, ЖОО-ның барлық 175 мамандығы бейінді пәндер шегінде 10 комбинацияға бөлінді. Бейінді пәндерді бітіруші қай ЖОО-на тапсыратынына байланысты мамандығын анықтау үшін өзі таңдауы тиіс.
ҰБТ-ны тапсыру мерзімі – 1 маусым мен 1 шілде аралығы, ТКТ – 17-23 шілде аралығында өткізіледі. 2017 жылғы тамыз айында және 2018 жылдың қаңтар айында ҰБТ-ны қайта тапсыру мүмкіндігі беріледі.
«ТКТ-ның жаңа форматы бойынша колледждер үшін 60 сұрақ қарастырылған, оның 20-сы жалпы пәндер және 40-ы бейінді пәндер бойынша. Бұл егер бітіруші өз бейіні бойынша оқитын болған жағдайда. Мысалы, педагогикалық мамандыққа баратын педагогикалық колледждің бітіруішісіне арналған. Қалғандары ҰБТ тапсырады. Тестілеу уақыты – 100 минут»,- деді Н. Оршыбеков.
Еске сала кетейік, 13 жылдың ішінде ҰБТ-ға 1,5 млн-нан астам оқушы қатысқан. Орта есеппен өткен жылдары ҰБТ-ға қатысқан түлектердің орташа пайызы 75%-ды құраған.
