Халық ақыны, жыр алыбы Жамбылдың шәкірті — Орынбай Таймановтың кесенесі қараусыз қалған. Осыдан 16 жыл бұрын жерлестері орнатқан күмбез қазір қирап, жетімнің күйін кешіп тұр. Аузымен құс ілген Кенен, Шашубай, Нұралы ақындармен есімі қатар аталатын Орынбай Таймановқа лайықты құрметтің болмауы- бүгінгі ұрпаққа сын.
Елінің жәйін жырлап, «Боралдайдың бозторғайы» деп қадірлеген тау тұлғалы ақынның кесенесіне апарар жолдың сыйқы осы. Ақжардың биігінде алты шақырымда жатқан баба басына бару үшін бірталай ой мен шұқырды теріп, санап барасың…
Ия, өз заманында елдің елдігі мен бірлігін жырға қосқан ақынның биыл мерейтойы. Мерейін өсіріп, марқайтудың орнына, мән-жайды айтып, мәселе қозғамақпыз. Уақыт өзгеріп, заман әуені түзелген тұста Орынбай Таймановтың 125 жылдық тойы тойланып, мазарына күмбез орнатылды, жерлестердің әупірімдеуімен. Өкінішке орай, Орынбай ақынға құрмет сол тоқсаныншы жылмен тәмәм болды.
Қазақстанда Халық ақыны деген құрметті атаққа лайық болған үш ақын болса, соның бірі тап осы Тайманов. Тек үкілі домбырасын дүйім елдің еңсесін көтеруге арнаған ақынға салынған сағананың қабырғасы түсіп, құлыптасы қирап жатыр. Бәйдібектің билік басындағылары болса, қудан үшкір талант иесіне көз қырын салып, кесененің қабырғасын тіктейміз деп, сөзден сарай тұрғызып кетті.
Алайда, айтылған уәденің ауылы алыстап барады бүгінде. Боралдайдың жарында жалғыз жетімсіреген ақынның аянышты кесенесі ұрпағын бір сәт өзіне көңіл бөлуге шақырғандай.
Қазақтың айтыс өнерінде өз биігі бар Орынбай Таймановтың туғанына биыл-150 жыл! Жамбылдың ізбасары, жыр саңлағына жасалар ізеттің ізі түгілі, жұрнағы жоқ. Жай күнде жақсысын төбесіне көтеретін Бәйдібектіктер әзірге үнсіз. Ең болмаса облыстық мәдениет басқармасы бұған назарын енді аударуы қажет-ақ. Киелі ауданның жаны жомарт кәсіпкерлері де сен тимесең, мен тиме. Тойхана мен клубты көбейткенше, баба кесенесін жөндеп жатсақ, арқалы ақынның жаны байыз табар еді. Өлі разы болмай, тірі байымайды. Өңірге басшы болып келген Жансейіт Қансейітұлы да жыр алыбы Жамбыл тамсана таңданып, Тауқұдірет атанған ақынның туған топырағынан. Өзінің қазақы болмысымен қарапайым тұрғысынан танылып жүрген Түймебаев тасада қалған Тайманов әруағының бір аунап түсуіне септігін тигізер. Ал ең бастысы, көзден кетсе де көңілден кетпеу керек тау тұлға бір ауылдың емес, бүткіл қалың қазақтың арқалы ақыны екендігін естен шығармай, өскелең ұрпаққа өнеге ету керек-ақ.
Гүлжан Нұрланқызы
