2017 жылғы 1 қаңтардан бастап ЕАЭО шеңберінде тең жағдайлар жасау үшін бірқатар салаларда баға реттеу жойылады, деп мәлімдеді ҚР ҰЭМ Табиғи монополияларды реттеу және бәсекелестікті қорғау комитеті төрағасы Серік Жұманғарин ОКҚ баспасөз конференциясында.
«Қазіргі кезде Қазақстанның мақсаты – бәсекелестік мәселелерінде Экономикалық ынтымақтастық және даму ұйымының (ЭЫДҰ) принциптері мен стандарттарына сәйкес келу, ал бұл еліміздің тауар нарықтарында бәсекелестік үшін аса жетілдірілген жағдайлар жасауды білдіреді», — деді С. Жұманғарин.
Ол 2014-2016 жылдар аралығында бизнес жұмысын оңайлатуға, оның интеграция жағдайында дамуы мен бейімделуіне бағытталған заңнаманы ауқымды ырықтандыру жүргізілгенін атап өтті.
«Бірінші кезеңде 2015 жылы монополияға қарсы орган жұмысының тұжырымдамасын өзгерту жөнінде заңнамаға көлемді түзетулер енгізілді. Осы жұмыс шеңберінде Кәсіпкерлік кодексіне «Бәсекелестік туралы» Заң имплементацияланды, сондай-ақ бірқатар жаңа өзгерістер мен толықтырулар енгізілді. Монополияға қарсы органның жаңа тұжырымдамасы – кәсіпкерге айыппұл салу емес, бәсекелестік заңнамасын бұзушылықтардың елеулі салдарлары туралы хабарлау және ескерту екенін түсіну маңызды», — деді С. Жұманғарин.
Оның айтуынша, жұмыстың екі жылдық циклының басты қорытындыларының бірі мемлекеттік баға реттеуден нарықтық баға белгілеуге өту болады.
«Осы мақсатта доминанттар Тізілімі 900-ден 254 нарық субъектісіне дейін қысқарды және оны темір жол көлігі, электр және жылу энергетикасы, мұнай өнімдерін өндіру, мұнайды тасымалдау, азаматтық авиация, порт қызметі, телекоммуникациялар және пошта байланысы, сондай-ақ газ саласындағы реттелетін нарық субъектілеріне қатысты ғана жүргізу болжанады. 2017 жылғы 1 қаңтардан бастап осы нарықтарда баға реттеу жойылады. Баға реттеуді жою ЕАЭО шеңберінде тең жағдайлар жасау шарасы ретінде енгізілді», — деп хабарлады комитет басшысы.
ҚР ҰЭМ-де түсіндіргендей, реттеу жүйесін реформалау баға реттеуден монополияға қарсы реттеуге өту жолымен болады (бұл монополиялық жоғары бағаларды белгілеумен байланысты бұзушылықтардың жолын кесу, картельдермен күресті күшейту, сатылас келісімдердің жолын кесу және басқалары).
Баға реттеуді жою көрсетілетін қызметтерге бағаның негізсіз көтерілуінің белгілі бір тәуекелін тудыруы мүмкін болғандықтан, 2020 жылға дейін азаматтық авиация, теміржол көлігі, электр энергетикасы, газбен жабдықтау салаларындағы қоғамдық маңызды нарықтарда баға реттеудің жаңа түрін енгізу көзделуде.
