Құрметті оңтүстікқазақстандықтар!
Сіздерді барша мұсылманның ұлық мейрамы Құрбан айт мерекесiмен шын жүректен құттықтаймын!
Қазақстан Республикасы зайырлы, толеранттық негізді алдыңғы бағытқа алып отырған мемлекет ретінде елдің рухани құндылықтарын басты назарға қойып отыр. Ата-баба дәстүрімен үңдестігін тапқан Құрбан айт мейрамы бүгінде мемлекеттік мереке дәрежесіне көтерілді.
Елбасы: «Құрбан айт ‒ ізгілік пен қайырымдылық мерекесі. Өткенді ой елегінен өткізіп, оң-терісіңді таразылап, ар-ожданыңды аршып, фәниден озған ағайын-туғанды еске алып, рухтарына тәу етіп, кемтарды қолтығынан демеп, жоқ-жітік пен мүсәпір-міскіндерге қол ұшын беру сынды мархабатты дәстүрлер қандай өркениеттің болсын өрелі үрдістерімен үндес. Бұл біздің мемлекетіміздің мұраттарына да етене жақын», − деді.
Елімізде жүргізіліп отырған мемлекеттік саясаттың басты бағыты − халықтың әл-ауқатын арттырып, ынтымағымыздың ішкі тұрақтылығын сақтау болып табылады. Ал ішкі тұрақтылықтың сақталуының бір факторы ол дін екені баршамызға аян. Зиялы қауым өкілдері ұлтымыздың ұйытқысы деп бағалаған өңірімізде түрлі дін өкілдері береке-бірлікте өмір сүріп, әдет-ғұрыптарын жандандырып, дамытып келеді.
Қымбатты жерлестер!
Елімізде Құрбан айт мейрамын шат-шадыман көңіл-күймен қарсы алу игі дәстүрге айналды. Оңтүстікқазақстандықтар қоғамдық келiсiм мен дiнаралық татулықты одан әрi нығайтып, егемен елімізді өркендету мен оның рухани құндылықтарын сақтауға күш-жiгерiн аямай жұмсай бередi деген сенiмдемiз. Сiздердi Құрбан айт мерекесiмен құттықтай отырып, мықты денсаулық, отбасыларыңызға амандық, бақ-береке тiлеймiн!
Оңтүстік Қазақстан
облысының әкімі Б. Атамқұлов
