Қазақстан Тәуелсіздігінің 25 жылдығын бұқаралық ақпарат құралдарында кеңінен насихаттағаны үшін «Айғақ» — «Үздік телеарна» номинациясын жеңіп алды. Облыстық БАҚ арасында өткен байқауда «Тәуелсіздік шежіресі» аталатын бағдарламалар топтамасы арқылы «Үздік» деп танылған ұжымға өңір басшысы Бейбіт Атамқұлов 1 миллион теңгенің сертификатын табыс етті. Расында тәуелсіздіктің ақ таңын, оған жетудегі сүрлеуге толы ел тарихын арна тілшілері кеңінен насихаттап келеді. Төл мереке қарсаңында ұйымдастырылыған мерекелік шарада тың да, жасампаз дүниелері арқылы танылып жүрген әріптестеріміз марапат төрінен көрінді.
Бұқаралық ақпарат құралдары шынында да билік пен бұқараның арасын жалғаушы алтын көпір. Төртінші билік атауын иеленген қауым, қашан да халық арасындағы түйіткілді мәселелерді жариялап, олардың оң шешім табуында үлесі басым жандар. Осы орайда облыс әкімі Бейбіт Атамқұлов оңтүстікқазақстандық БАҚ өкілдерін төл мерекемен құттықтай отырып, журналистер қауымының қолында тұтас халықтың тағдырын өзгерте алатын қуаттың барын екендігін ерекше атап өтті. 
Журналистика – сапалы дүние мен салиқалы пікірді қажет ететін қоғаммен тікелей қарым-қатынастағы сала. Қай кезде болмасын танымдық-тәрбиелік маңызы зор дүниелерді, тың ақпарларды халыққа жеткізуге бейім, қабілетті жандардың орны биікте. Бұл күні ел дамуының жарқын көрсеткіштерін телеэкран арқылы насихаттаудан танбаған «Айғақ» телеарнасы ұжымының еңбегі бағаланды. «Үздік телеарна» номинациясын жеңіп алған телеарнаның бас редакторы Эльвира Ортаеваға өңір басшысы Бейбіт Атамқұлов 1 миллион теңгенің сертификатын табыс етті.
Айта кету керек, ел Тәуелсіздігінің 25 жылдығына орай ұйымдастырылған аталған байқауға арна тілшілері 25 бағдарламадан тұратын «Тәуелсіздік шежіресі» топтамасын көрермендер назарына ұсынған болатын. Мазмұны егемендік тарихын насихаттауды мақсат тұтқан телехабарларда облыстағы мемлекеттік басқару жүйесінің қалыптасуы мен ел басқарған азаматтар туралы естеліктер кеңінен суреттеледі. Тәуелсіздікке деген арнамыздың тартуы.
Өз шығармашылығы арқылы қоғамға да, адамға да қызмет ететін, қателікті кешірмейтін, қашан да жаңалықтың жақтаушысы болатын журналистердің еңбегі еселі. Облыс дамуындағы үлес, қажыр-қайрат ескеріліп, «Айғақ» қоғамдық телеарнасының редакторы Тойболова Салтанат Хайруллақызына облыс әкімі «Құрмет грамотасын» табыс етті. Өзіндік стилі мен журналистикадағы орны айшықты әріптесіміз нағыз өз кәсібін сүйетін жандардың бірегейі.
Қоғаммен етене жақын мамандық иелерінің негізі мақсаты халықты ақпаратпен қамтамасыз ету. Жаңарған, жасарған қазақ журналистикасы өкілдерінің саны біздің өңірде басым. Жалпы өңірімізде 253 бұқаралық ақпарат өкілдері жұмыс жасайды. Олардың: 175-і газет, 48 журнал, 13 теларна болса, 13-і сайт және 4 радио. Бұл еліміздегі БАҚ-тың 30 пайызын құрайды. Қазақстан Республикасы Журналистер Одағының шешімімен қаламгерлерге берілетін ең жоғарғы марапат – Қазақстанның «Құрметті журналисі» атағын биылғы жылы біздің өңірде Слам Нұрмағанбетұлына беріліп отыр. Елдің танымдық және ақпараттық дамуында талмай қызмет етіп жүрген журналистер қауымының жылына бір келетін мерекесі осылайша салтанатты түрде аталып өтілді. Құрмет – еңбекке, марапат – үздікке жасалатындығы тағы бір рет дәлелденді. Әріптестермізге қарымды қаламдарыңыз мұқалмай, еңбектеріңіз жана берсін демекпіз!
Облыстың үздігі атанған «Айғақ» телеарнасының танымдық дүниелерін тамалашалаушы телекөрермендері жетерлік. Облыс әкімі Бейбіт Бәкірұлы да арнамыздың тұрақты көрермендерінің бірі. Өңір басшысы осындай мерейлі күнде «миллионер» телеарнаның микрофонын жоғары көтеріп, өзінің ерекше қолдауын көрсетті. Билік пен бұқараның арасын жалғаушы, алтын көпір «Айғақ» телеарнасы алдағы күндері де өз бағытынан айнымақ емес.
Ботагөз Мәдібек
