2013 жылы Елбасы Нұрсұлтан Назарбаевтың Жарлығымен 23-ші маусым мемлекеттік қызметшілер күні ретінде қабылданған болатын. Биыл міне аталған мереке 4-ші рет салтанатты түрде аталып өтілді. Ел дамуында елеулі еңбек етіп жүрген облысымыздың мемлекеттік қызметшілерінің қатысуымен мерекелік жиын ұйымдастырылды. Алаштың көрнекті қайраткері Әлихан Бөкейханов: «Ұлтқа қызмет ету білімнен емес, мінезден» деген екен. Расында, білімі мен білігі толысқан, алайда қарапайым елге деген жанашырлығы жоқ жаннан келісті басшы шығуы екіталай. «Елге еткен қызмет -абыройлы міндет» деп білген мемлекеттік қызметшілер біздің өңірдің әрбір аудандарында табысты қызмет етуде. Жылына бір келетін осы бір төл мерекемен жиылған қауымды құттықтаған облыс әкімі Бейбіт Атамқұлов: «Мемлекеттік қызметші – әрбір істе билік пен халықты жалғайтын алтын көпір» екендігін ұмытпауға шақырды. 
Билігі мықты елдің – тірлігі құтты. Өз саласында жемісті еңбек етіп, өз ұжымын алға жетелеген бірнеше азаматқа бұл күні өңір басшысының тарапынан құрмет көрсетілді. Мереке күнінде мерейі үстем болған жандардың бірі — Бақтияр Аталықов. 40 жылдан бері мемлекеттік қызмет саласында еңбек еткен ел ағасы бүгін «ОҚО-на сіңірген еңбегі үшін» медалімен марапатталды. Ардагер бүгінде ҚР Экономика министрлігі табиғи монополияларды реттеу және бәсекелестікті қорғау комитетінің ОҚО бойынша департаментінің басшысы қызметін атқарып, ел дамуына үлес қосуда.
Мемлекет басшысының «Ұлт жоспары – Қазақстандық арманға бастайтын жол» еңбегінің алғашқы кіріспесі халық мүддесіне қызмет ететін мемлекеттік аппаратты кәсібилендіруден басталады. ҚР Мемлекеттік қызмет істері министрлігінің облыс бойынша департаментінің басшысы Берік Бекжанов мемлекеттік қызметкерлердң ең бірінші кезекте қарапайымдылық пен қанағатшылдықты дәріптеуге шақырды.
2016 жылдан бастап мемлекеттік қызметшілерде жауапкершілікпен қатар жалақы да артып отыр. Яғни әрбір халыққа қызмет етушінің айлық табысы бұрынғыдан орта есеппен алғанда 30 пайызға өсті. Біздің өңірдің өзінде ел мүддесі жолында бас-аяғы 8217 мемлекеттік қызметкер қызмет жасауда. Мереке қарсаңында айтарымыз, мәңгілік ел үшін қажырлы еңбек етер жандар көбейсін!
Ботагөз Мәдібек
