23 маусым — Қазақстан полициясының күні. Құқық қорғау саласындағы қызметкерлердің кәсіби мерекесі қарсаңында генерал-майор Молдияр Оразалиевпен кездесу ұйымдастырылды. Ішкі істер органдарында лайықты еңбек етіп, бүгінде есімі елеулі азамат жас полициялармен еркін ой бөлісті. Өзінің өткен өмір жолы туралы сыр шертіп, ізбасарларына патриоттық рух берді.
Салтанатты басқосу облыстық ішкі істер департаментінің ғимаратында ұйымдастырылған. Полиция саласындағы мамандар жиылған залға генарал кіріп келгенде барлығы тік тұрып қарсы алып, әуелі құрмет көрсетті. Алғы сөзді ІІД бастығы Асқар Оспанов ашып беріп, құрметпен шақыртылған Молдияр Молыбайұлына сый табыстады. Яғни қазақтың салт-дәстүрін бәрінен биік қойып, ең алдымен иыққа шапан жапты.
Еңбек жолын 1974 жылдан бастап, жалпы саны бес облыста еңбек еткен генерал-мойор кейінгі буынға үлгі. Еліміз Тәуелсіздік алған жылдарда облыстағы ішкі істер департаментін басқарып, сол жылдары талай қылмыскердің ізі кесілген. Ал, вице-министр тұсында өскен өнген өлкесі Оңтүстікке көп көңіл бөлуге тырысқан. Жалпы сырлы сұхбат болып, ашық ойлары айтылған бұл басқосуға генерал-майор Молдияр Оразалиев құдай қосқан жұбайын ерте келіпті.
Құқық қорғау саласының құрметті азаматы әркез қиындықтың артында, бір қызықтың барына сеніпті. Жоғарғы шенге жету үшін талаптанып еңбек еткен. Оңай жолмен келмеген атақ пен аброй туралы тарқата айтып, бүгінгі мамандарды адал болуға шақырды. «Дәніккеннен құныққан жаман» екенін алға тартып, қанағат барлық байлыққа жетелейді деп сөз түйді. Көптеген наградалар мен марапаттардың иегері Малдияр Оразалиев жеткен жетістіктерін айтып, полицияларды мерекесімен құттықтады. Жиын соңында патриоттық әндер орындалып, концерттік бағдарламаға ұласты.
Бағлан Байкөбекқызы
