Мектеп оқушыларының жазғы демалыстарын тиімді ұйымдастыру мақсатында биыл Оңтүстік Қазақстандағы 24 жазғы сауықтыру лагерінде 54 мыңға жуық бала демалмақ. Аталмыш демалыс орындары маусым айынан өз жұмыстарын бастаса, алғашқы кезең бойынша облыс лагерлері 5 мыңнан астам оқушымен қамтылған. Сондай-ақ, биыл әлеуметтік тұрмысы төмен, жетім және жартылай жетім 10 мыңға жуық бүлдіршін лагерлерге тегін жолдамамен барады деп күтілуде. Айта кету керек, аудан, қалаларда орналасқан мемлекеттік лагерлер үшін жазғы демалысты ұйымдастыру маусымына жергілікті бюджеттен тиісті қаржы қаралған. Осылай деген облыстық білім басқармасының салаға жауапты мамандары лагерлер барлық қажетті жабдықтармен қамтылып, мамандар жағынан да тапшылық жоқ екендігін айтады. Міне осы бағыт бойынша балғын балалардың жазғы сауықтыруларын бірнеше кезең бойынша жүзеге асырғалы отырған лагерлер жаңа оқу жылына дейін жоспарлы тізімдегі оқушыларды қамтып үлгерулері тиіс.
