Бүгін Оңтүстік Қазақстан облысындағы барлық мектептерде дәстүрлі «соңғы қоңырау» салтанатты шарасы өтті. 2015-2016 оқу жылында облыстағы 1022 мектепте 584089 оқушы білім алса, оның 31288 биыл мектепті бітірді. Түлектер ішінде 1440 оқушы «Алтын белгі» белгісіне, 603 оқушы жалпы орта білім туралы үздік аттестат алуға үміткер. Айта кеткен жөн, былтырғы оқу жылында 609 бала «Алтын белгі» белгісін растаған болатын.
Назарбаев зияткерлік мектебі еліміздегі ең озық әрі кәсіби маман даярлаудағы алғашқы баспалдақ. Жаңа технологияларды бір арнаға тоғыстырып, білікті ұстаздардың жастарды тәрбиелеудегі тың әдіс тәсілдері ойысқан білім ордасы. Қазірдің өзінде мектепте 129 оқушы жас түлек атанса, оның бірқатары бүгіннің өзінде түрлі гранттардың иегерлері. Яғни, халықаралық, республикалық байқаулар мен жобаларда бақ сынап үздік деп танылғандар. Бұл білім ошағы ұстаздарының нағыз ел экономикасы мен әлеуетінің артуына ықпал ететін мамандар даярлаудағы еселі еңбегі. Үлкен өмірге қанат қағып, болашағынан зор үміт күттірер жас түлектерді облыс әкімі арнайы құттықтап, тілегін жеткізді.
Облыстағы 1022 мектептің 30 мыңнан аса түлегі алтын ұяларымен қоштасты. Осы бітірушілердің 1440 «Алтын белгіге» үміткерлер болса, 603 Үздік аттестаттан ниеттілер. Айта кетейік, бітірушілер 2-15 маусым күндері аралығында өтетін сынақ Ұлттық біріңғай тестілеуге 74,3 пайыз қатысуға өтініш білдірген. Өткен жылмен салыстырғанда оқушылардың тестілеуге қатысу көрсеткіші жоғары. Оңтүстік абыройын асқақтатып, білім берудегі дәрежесін арттыруда Назарбаев зияткерлік мектебінің шәкірттері де белсенді. Өйткені ұстаздар оқушыларға білім мен тәрбие беріп бәйгелерде топ жарып озып шығуы үшін тәжірибесін, бүкіл өмірін арнаған. Ал талапкерлердің бұл соңғы рет оқушы кейпінде қатарда тұрған сәті. Жанарларында жас, көңілінде қимастық, үлкен үмітте бар. Жас түлектер үшін соңғы рет естілген қоңырау үні ерекше, жүректе мәңгі сақталады. Белгілі бір кезеңмен қоштасу үлкен өмірмен кездесу сәтінде мектеп бітіруші түлектердің ата-аналары да арнайы келді. Олар ұл- қыздарынан және олардың құрбы құрдастарынан Қазақстан халқы үміт күтерін, ел болашағының дамуы жолында аянбай еңбек ететініне сенеді. Ата-ананың ізгі тілегі үкілі үміті жас түлектерге күш қуат, шалқар шабыт сыйлайтыны анық. Салтанатты кеште сыңғырлаған қоңырау үні түлектер үшін соңғы рет соғылды. Ал, өзге оқушылар бір сынып жоғарылап, жазғы каникулға аттанды. Балалық шақ уайымсыз мектеп жылдарымен қоштасу қоңырауынан кейін жас түлектер білім ордасының табалдырығында мектеп вальсін биледі. Ұстаздарына алғысын, жеткізіп музыкалық сәлем жолдап жатты. Биылғы жылы бітірген түлектердің мектеппен қоштасуы Тәуелсіздіктің 25 жылдық меркесімен тұспа тұс келіп отыр. Ендігі мақсат биік белестерді бағындырып, білімнің шырқау шыңына шығып, елдің сан саласында қызмет етіп, абыройды асқақ ету осы жас буынның қолында. Елбасы әр сөзінде жастарды қанаттандырып, жігерлендіріп, болашақ жастардың қолында екенін де айтып келеді. Сондықтан мәңгілік елдің құрушылары жасампаз жастар бәсекеге қабілетті әрі білімді талапты маман атанып, ел экономикасы мен әлеуеттің қарышты дамуына сүбелі үлес қосуы тиіс.
Еңлік Заманхан
