Жақында Қазақстанның Чехиядағы елшісі Сержан Әбдікәрімов осы елдің Оломоуц аймағындағы Йесенице өңіріне (Горны Липове, Домашов, Рудохоржи елді мекендері) барып, жергілікті өкімет пен қоғамдық ұйымдар өкілдері және ерікті-іздеушілермен бірге, кеңес әскери тұтқындарының, оның ішінде Қазақстаннан тартылған әскери жауынгерлердің зиратына гүл шоқтарын қойды.
Екінші дүниежүзілік соғыс жылдарында Йесенице өңірінде Кеңес Одағы республикаларынан, Ұлыбритания, Франция және Польшадан 6 мыңға жуық әскери тұтқын жұмыс істесе, ол жерлерде немістің 60-қа жуық еңбек лагерьлері орналасқан екен. Ресей және Чехияның қоғамдық ұйымдарымен, ерікті іздеушілермен сол лагерьлерде қаза болған 1300-ге жуық әскери тұтқынның, оның ішінде 16 қазақстандық жауынгердің аты-жөндері мен өмірбаяндық мәліметтері жинақталды (ақпарат www.obd-memorial.ru парақшасында орналасқан). Йесенице өңірінің жергілікті өкіметімен және ерікті-іздеушілермен сол маңда жерленген басқа да отандастарымызды іздестіру және сәйкестендіру бойынша жұмыстарды жалғастыру жөнінде уағдаластықтарға қол жеткізілді.
Қазақстанның Прагадағы елшілігі қаза болған отандастарымыздың туған-туысқандарына өздерінің әке-аталарының жерленген жерлерін іздеп анықтау үшін Чехияның жергілікті өкіметімен байланыстар орнатуына қолғабыс көрсетуге дайын екендігін білдіріп отыр.
Бұл мәселе бойынша Қазақстанның Чехиядағы елшілігінің бірінші хатшысы Дамир Уажановқа хабарласуға болады. Оның жұмыс телефоны: +420 233 310 671, ұялы телефоны: +420 739 341 414, эл. поштасы: d.uazhanov@mfa.kz.
Қазақстан азаматтары үшін елшілік Чехия жерінде жатқан отандастарымыздың аты-жөндерін жариялап отыр:
Жұмағазы Алтыбаев, 1921 ж.т., Алматы облысы («13 март» ауылы); Молдынамов, 1904 ж.т., Кирилловка ауылы; Алвип (Алби, Алиби) Тайла, 1899 ж.т., Гурьев облысы, Маңғыстау ауданы, Ауырпа ауылы; Смаил Бейминов, 1906 ж.т., Ақтөбе облысы (Ырғыз ауылы); Таш (Тажи, Тас) Утюгулов, 1900 (1903) ж.т., Ақтөбе облысы (Шұбарқұдық ауылы); Сантай Істілеев (Истелеев), 1915 ж.т., Қызылорда облысы (Октябрь ауылы); Байекі (Bajeki) Көселбаев (Касельбаев), 1912 ж.т., Қызылорда облысы (Қазалы қ.); Наркаш Күлжұманов (Күлшуманов), 1904 ж.т., Жангелді ауданы (Бірлік ауылы); Шаяхмет (Шейахмед) Сүлеменов (Сүлейменов), 1921 ж.т., Шығыс Қазақстан облысы, Тарбағатай ауданы (Зайсан ауылы); Белгібай Сүлейменов, 1903 ж.т., Шығыс Қазақстан облысы, Тарбағатай ауданы (Зайсан ауылы); Жұмағұл Исмурзин, 20 шілде 1897 ж.т., Қостанай облысы, Семиозер ауданы (Жаркөл ауылы); Муфтуәли Досмұхамбетов, 1891 ж.т., Саратов облысы, Балаково ауданы (Наталин ауылы); Сағи Алманов, 1898 ж.т., Сталинград облысы (Харабали селосы, Комсомольская көшесі, 3. Сырдалы Арсалиев, 1903 ж.т., Қызылорда облысы, Арал ауданы (Күртарал ауылы); Қалмырза Амалбеков, 1906 ж.т., Оңтүстік Қазақстан облысы, Киров ауданы (Интернационал ауылы); Айси Досмырза, 1913 ж.т., Қазақ ССР, Рузаев ауданы (Ақшынақ ауылы).
Ақпарат көзі: «Егемен Қазақстан» газеті
