Футболдан премьер-лига командаларының үшінші турдағы ойындары аяқталды. Талдықорған қаласында жергілікті «Жетісу» командасымен жасыл алаңға шыққан «Ордабасы» футболшылары сырт алаңда 1-2 есебімен жеңіске жетіп маңызды деген үш ұпайға ие болды. Осының алдындағы 2-турда «Астанамен» болған ойында төрешілердің қысымына шыдай алмаған «Ордабасы» командасының бас бапкері Бақтияр Байсейтов өз наразылығын ашық түрде көрсеткен болатын. Команданың тас қамал қорғаушысы Мұхтар Мұхтаров қатаң ескерту алып алаңнан қуылған еді. Мамандар «Ордабасы» осы соққыларды көтере алмай қалмаса болғаны деп өз пікірлерін білдірді. Дегенмен 3-турда жігерлілік танытқан «Ордабасы» футболшылары сырт алаңда кереметтей ойын өрнегін көрсетті. Алғаш болып биылғы чемпионаттың сұрмергені, хорватиялык шабуылшы Эдин Юнузович 25-минутта есеп ашты. Есеп 0-1. Ойын алаңының жасанды болғанына қарамай шаубылдағы бағытынан таймаған оңтүстікқазақстандықтардың мақсаты орындалды. Арада аз уақыт өтпей 38-минутта тағы бір мықты футболшы ұлттық құрама ойыншысы Азат Нұрғалиев екінші голдың авторы атанды. Есеп 0-2.
Ойынның екінші кезеңінде есе қайыруға ұмтылыс жасаған Алмас Құлшынбаев шәкірттерінің ойлағаны мақсаты орындалмады.Құрама сапындағы Борис Кадио сынды серкелердің сансыз шабуылдарына қақпашы Сергей Бойченко лайықты тосқауыл қоя білді.Қонақтардың қорғанысы сыр бермеді. Кездесудің 67-минутында «Ордабасы» ойыншысы Еркебұлан Тұңғышбаев екі рет алған ескертуі салдарынан алаңнан қуылды.10 ойыншысы қалған жерлестеріміз бүкіл команда болып қорғанысқа көшті. Алайда бүгінгі ойында аса белсенді футболшы Борис Кадио бір гол салып есеп айырмасын қысқартқанымен,»Жетісу» командасының есепті теңестіруге шамалары келмеді. Қорытынды есеп 1-2
Осылайша жерлестеріміз аса маңызды деген үш ұпайға ие болып турнир кестесінің алдыңғы легінде кетіп бара жатқан командалармен қатарласа бастады. Турнир кестесінің көшін әлі бірде –бір рет жеңіліс көрмеген,тіпті өз қақпаларына бір доп жібермеген Павлодардың «Ертісі» бастап келеді. Олар кешегі турда «Атырау» футболшыларын 3-0 есебімен ойсырата ұтты. Енді жерлестеріміз, 9- сәуір сенбі күні, осыған дейін жеңілістің ащы дәмін сезінбеген Қостанайдың «Тобылымен» өз алаңында кездеседі.
