Қазақстан Дүниежүзілік сауда ұйымына кіруіне байланысты бірқатар міндеттемелерді қабылдады. Тиісінше кәсіпкерлерге, шетелдерден тауарлар алып келетін мекемелер мен тасмалдаушы, экспорттаушыларға түсіндіру жұмыстары да қолға алынды. Осы мақсатта ОҚО Мемлекеттік кірістер департаментінің қызметкерлері импортталған тауардың экспортқа шығарылмауын қамтамасыз ету мақсатында Сарыағаш ауданында кездесу өткізді. Көршілес елмен жақын орналасқан ауданда кеденнен тауар жеткізіп, немесе өнімін шетелге өткізетіндердің қатары көп. Жиынның осы аймақта өткізілуінің де мәні осында. Жалпы, Оңтүстік аумағында ДСҰ мөлшерлемелерімен тауар әкелетін мекемелер жетерлік. Тауарлар көбіне өз қажеттеріне пайдалану үшін жеткізіліп жатады. Ал енді кедендік төменгі мөлшерлемелермен кіргізілген тауар, яғни Қазақстанда ғана сату үшін әкелінетін, тіркелетін заттар Еуразиялық Экономикалық Одағының елдеріне, басқа мемлекеттерге сатылымға жіберілмейді. Оларды қайта шығару жағдайында тиісті құжаттарыңызды рәсімдегеніңіз жөн. Жиын барысында тауарларды бір елден екінші елге тасымалдаушы, немесе отандық саудаға енгізіп жүрген кәсіпкерлер тарапынан сұрақтарда туындады. Арнайы топ салық төлеушілерге саладағы бағытты баяндап берді. Жаңадан бекітілген міндеттемелерде түсініспеушілік орын алмас үшін кәсіпкерлерге тиісті мекеме бағдар беруге де дайын. Сарыағаш ауданы Өзбекстан елімен шекаралас жатыр. Мұнда «Қапланбек» кеден бекеті арқылы алыс, жақын елдерден тауарлар әкелінеді. Алайда кез келген шетелден жеткізілетін заттар қатары енді кеденнен өткізіле бермейтін болған. Бекітілген алып қою тізбесіне 1347 тауар атауы енгізілді. Оның ішінде ауылшаруашылық өнімдері, жеңіл өнеркәсіп, көлік құралдары тағы басқасы бар. Енді салық төлеушілер кедендік мөлшерлемелерде тауарының қандай бағытқа жеткізілетінін анықтап, сол бойынша тиісті құжаттарды енгізуі тиіс. Себебі тек, Қазақстанда ғана сатылуға кіргізілген тауарлар Еуразиялық экономикалық одақтың елдеріне тиісті құжатсыз еркін өте алмайды.
Жомарт БЕГІМБЕТОВ
