ІЗДЕЙМІЗ!
Ресей Федерациясындағы іздеу бірлестігінің «Естелік-2015» вахталық жұмысы барысында Калужск (бұрынғы Орлов) облысы, Ульянов ауданы, Железница деревнясында Ұлы Отан соғысында қаза болған қазақ жауынгері Тәжібаев Мақаштың сүйегі табылды. Ресей Федерациясы іздеушілерінің берген мәліметі бойынша, өткен жылдың жаз мезгілінде Ұлы Отан соғысы Жеңісінің 70 жылдығына орай ұйымдастырылған шара барысында осы аймақта іздеу жұмыстарын жүргізілген. Қазба жұмыстары кезінде жанында медалі және мүлдем жарамсыз фотосымен құжаты бар белгісіз жауынгердің денесі табылған. 1939 жылы Мәскеуде өткен Жалпыкеңестік ауылшаруашылық көрмесінің кіші күміс медалі кімге тиесілі екенін анықтау үшін іздеу тобы аталмыш көрменің мұрағат бөліміне сұрау салады. Араға алты ай салып анықталғаны медаль Жалпыкеңестік ауылшаруашылық көрмесі Бас комитетінің Қаулысымен 15 сәуір 1940 жылы №5 9-МТС-ның тракторшысы Мақаш Тәжібаев (1938 жылы «СТЗ» 563,4 га тракторында жұмыс істеген) берілген екен.
(Жауынгер М.Тәжібаевтың сүйегінің жанынан табылған кіші күміс медаль Мәскеуде өткен Жалпыкеңестік Ауылшаруашылығы көрмесінде берілген).
( М.Тәжібаевтың 1939 жылы Мәскеуде өткен Жалпыкеңестік Ауылшаруашылық көрмесіне қатысуға берілген өтінішінің облыстық мұрағатта сақталған құжаты).
Өздеңізге белгілі «Айғақ» телеарнасы Ұлы Жеңістің 70 жылдығына орай бес жылға созылған сұрапыл соғыс өткен ірі ошақтарда болып, деректі фильм әзірлеген болатын. Осыны ескерген Александр Кузнецов «Айғақ» телеарнасының басшысы Дулат Әбіш мырзаға жауынгердің жақындарын іздеп табуына көмек беру үшін өтініш хатпен шығады. Осы деректер бойынша біздің арнаның тілшілері де хат келген күннен бері жат жерде мәңгілікке көз жұмған қазақ перзентінің туған-туыстарын, ол туралы өзге де ақпараттарды жедел іздестіруде.
(1940 жылдары егістік даласында еңбек еткен азаматтардың тізімінде М.Тәжібаевтың аты-жөні де жазулы).
(1942 жылы бұрынғы Шаян аудандық әскери комиссариатынан аттанған азаматтардың тізімінде М.Тәжібаевтың да аты аталады).
Белгілі болғандай, Тәжібаев Мақаш – 12 гвардиялық атқыштар дивизиясы, 37 гвардиялық атқыштар полкының қатарындағы жауынгер-атқышы болған. 1910 жылы Бәйдібек ауданы, Мәдениет ауылдық кеңесінің, Мыңбұлақ бөлімінде туылып, 1942 жылы Шаян аудандық әскери комиссариатынан майдан даласына аттанған. Ал, сол жылдың 25 тамызында Шаяндық перзенттің соғыс даласында із-түссіз кеткендігі туралы «Мыңбұлақ» ұжымшарында тұратын жары Әтір Тойшыбаева (кей деректерде Тажибаева) 1942-жылдың тамызында қаралы хабар келген. Нақты айтқанда, «қара қағаз» ол уақыттан бері қазақтың бір баласы Мақаштан ешқандай хабар осы күге дейін болмаған. Тіпті, оның артында ұрпағының қалмағандығы туралы да әзірге мәлімет жоқ.
Жерлесіміз, жауынгер Мақаш Тәжібаев туралы деректер білетін азаматтар болса, «Айғақ» редакциясына хабарласыңыздар:
Байл. тел: 8 (7252) 213-611 немесе E-mail: aigak@mail.ru
