Расында, облысымыздың іскерлік элитасы Республикамыздың өзге өңірлерімен салыстырғанда қашан да алдыңғы орында. Кәсіпкерлікке бейім өлкемізде бірінші болып «Оңтүстік» индустриялды аймағының ашылуы да соның дәлелі. 70-ке тарта жобаға серпін беріп, мыңдаған жергілікті тұрғындарды тұрақты жұмыспен қамтыды. Одан өзге де табыс көзін тауып, еңбегінің жемісін көріп отырғандар бізде жетерлік. Қазіргі әлемдік экономикалық қиындықтарға қарамастан қажырлы еңбек ету басты міндет екендігін облыс әкімі Шымкенттегі «Rixos Khadisha Shymkent» қонақ үйінде кәсіпкерлік саласындағы жыл үздіктерін марапаттау сәтінде ерекше атап өтті. Бұл күні өңір басшысы Бейбіт Атамқұлов 13 аталым бойынша кәсіпкерлік саласының кіл мықтыларын, яғни 39 азаматты марапаттады. 
Соның ішінде,«Жылдың үздік кәсіпкері» ретінде «Отау Строй» компаниясының басшысы Қайрат Молдасейітов танылды. Өндірістік салада ең үздік серіктестік жоғарғы дәрежедегі облыс әкімінің дипломына ие болды. Шымкент қаласының он бірінші әкімі болған бұрынғы шенеунік, бүгінде белгілі бизнесмен Қайрат Молдасейітов осылайша «Жылдың ең үздік кәсіпкері» атанды. Атап өтерлігі, «Үздік кәсіпкер» атанған Шымкенттің экс-әкімі жұртшылыққа ең ауқатты шенеунік ретінде де таныс. Әкім болып тұрған кезінде ол есепшотында 316 миллион 200 мың теңгесі мен 3 миллион 900 мың доллары және де жер учаскесі бар екенін мәлімдеген.
