Шымкент қаласында Мемлекеттік хатшы, ҚР Президентінің жанындағы әйелдері істері және отбасылық-демографиялық саясат жөніндегі ұлттық комиссияның төрайымы Гүлшара Әбдіқалықованың қатысуымен Халықаралық форум өтті. «Қазақстан жаңа жаһандық нақты ахуалда-әйелдер үшін жаңа мүмкіндіктер» атты форумға облыс әкімі Бейбіт Атамқұлов, Ұлттық комиссия мүшелері, халықаралық ұйымдардың, бизнес құрылымдарының, және азаматтық қоғам өкілдері мен сарапшылар қатысты. Қоғамдағы әйелдердің рөлі мен қоғамдық-саяси ілгерілету және нәзік жандылардың шағын және орта кәсіпкерлік саласындағы үлестерін арттыру мәселелері жан жақты сөз болған форум маңызы айрықша. Форум жұмысын облыс әкімі Бейбіт Атамқұлов құттықтау сөзбен ашып берді. Ал өз кезегінде Мемлекеттік хатшы, ҚР Президентінің жанындағы әйелдері істері және отбасылық-демографиялық саясат жөніндегі ұлттық комиссияның төрайымы Гүлшара Әбдіқалықова мұндай келелі басқосуды ұйымдастыруға ұйытқы болған әкімдікке өз алғысын білдіріп өтті.
Сондай –ақ баяндама барысында Гүлшара Наушақызы отбасылық-демографиялық саясат, өскелең ұрпақтың репродуктивті денсаулығы, әйелдерге қатысты зорлық-зомбылық мәселелеріне және нәзік жандыларды қоғамдық саяси ілгерілету мәселелеріне ерекше тоқталып өтті. Оның айтуынша соңғы бес жыл ішінде ОҚО-да ана мен бала өлімі 2 есеге төмендеген. Десе де туу көрсеткіші жоғары өңірде бұл нәтижені әрмен қарай да жақсарта түсу қажет. Бұл ретте Гүлшара Әбдіқалықова жергілікті жердегі медицина мамандарының біліктілігін арттыру қажет деп санайды. Сондай –ақ жыл басынан бері ОҚО-да әйелдерге зорлық-зомбылық көрсету фактілері бойынша 11 мыңнан астам қылмыс тіркелген. Бұл жайттың да алдын алу қажеттігіне әкім назарын аударған ұлттық комиссия төрайымы әйелдер арасындағы шағын және орта кәсіпкерлікпен айналысу көрсеткішін арттыру қажеттігіне де кеңінен тоқталды.
Осындай келелі ойлар мен ұсыныс пікірлер ортаға тасталған форум барысында ұлттық комиссия мүшесі, Қазақстан іскер әйелдер қауымдастығының Президенті Раушан Сәрсенбаева да баяндама жасап, әйел азаматшалардың кәсіпкерлік саласындағы үлестері әлі де болса төмен екендігін жеткізді. Тіпті мемлекеттік бағдарламалар аясында несие алып өз кәсібін ашқан нәзік жандылардың саны тұрғыны мол ОҚО-да әзірге аздау болып тұр. 
Ал өз кезегінде мінбеге шығып сөз алған әйелдер істері және отбасылық-демографиялық саясат жөніндегі ұлттық комиссияның мүшесі, Республикалық «Экомед» адам ұрпағын өрбіту орталығының директоры Салтанат Байқошқарова Оңтүстік өңіріндегі ана мен бала денсаулығына қатысты мәселелерге кеңінен тоқталды. Салтанат Берденқызының сөзінше елімізде дүниеге келетін әрбір төртінші бала Оңтүстікте туылады. Алайда ана мен бала өлімінің көрсеткіші мұнда әлі де жақсы деуге келмейді. Айталық жыл басынан бері өңірімізде 8 ана көз жұмған. Сондықтан әйелдерге медециналық көмек көрсету сапасын барынша жақсарта түсу қажет.
Абай Омар
