Сәрсенбі күні Шымкент қаласының әкімі Ғабидолла Әбдірахымовтың төрағалығымен кеңейтілген жиын өтті. Күн тәртібінде қалалық экономика және қаржы бөлімінің басшысы Рахымберді Мулкеманов жыл соңына дейінгі бюджет қаржыларының игерілу жағдайы, мемлекеттік бағдарламардың орындалу барысы туралы баяндама жасады. Қазіргі таңда, шаһарымызда 9 мемлекеттік бағдарлама жүзеге асырылуда. Атап айтар болсақ, «Жұмыспен қамту-2020» жол картасы бағдарламасы бойынша биыл 5 инфрақұрылымдық жобаны жүзеге асыру мақсатында жұмыспен қамту орталығы арқылы 108 жұмыссыздарды жолдау қажет болатын. Мұнан өзге, биылғы жылдың өзінде саябақтарды абаттандыру, тұрғын үйлерді жаңғырту мәселелері де өз шешімін тапқан. Дейтұрғанмен, 7 бірдей құрылыс нысанға қаржы уақтылы қаралғанмен, бүгінде әлі аяқталмаған. «Өңірлерді дамытудың-2020 жылға дейінгі бағдарламасы» бойынша қалалық құрылыс бөлімі арқылы 2015 жылы барлығы 41 тұрғын үйдің құрылысы жүргізілуде екен. Оның ішінде 2699 пәтерлі 37 тұрғын үйдің құрылысын жыл соңына аяқтау жоспарланған. Ал, 11 үй жұмыс комиссиясымен қабылдануда. Сонымен қатар, «Қазақстан ипотекалық компаниясы» ЖШС арқылы жыл басынан 1572 пәтерді пайдалануға беру жоспарланған. Қазіргі таңда 1080 пәтердің құрылысы аяқталып, кезекте тұрған азаматтарға берілуде. Ал, өз жұмысына салғырт қарап, құрылысты кешеуілдеткен мердігер жұмысын өз бақылауыма аламын деген Шымкент әкімі Ғабидолла Әбдірахымов барлық құрылыс жұмыстарын дер кезінде аяқтауды тапсырды. Қалалық кәсіпкерлік бөлімінің жұмысы да бүгінгі жиында сөз болды. Бөлім басшысы Асқар Қаныбековке қаладағы индустриалды аймақтағы жұмысы туралы кәсіпорындардың тірлігіне жан бітіруді жүктеді қала басшысы.
Ұлдархан УӘЛИХАНҚЫЗЫ
