Елбасының жыл сайынғы халыққа арналған жолдауының бір саласы – жас мамандарды дуалды жүйеде оқыту. Теория мен іс-тәжірибені ұштастыра бәскеге қабілетті кадрларды даярлау әдісі біздің өңірде де біршама шешім тауып отыр. Жаңа оқу жылынан бастап, ауылшаруашылығы саласында жаңа технологияларды тиімді пайдалану үшін Шымкент аграрлық колледжі жанынан салынған оқу-өндірістік база өз жұмысын бастады. Орта арнаулы оқу орындарын айтпай-ақ, кейбір жоғарғы оқу орындарының өзінде жоқ базаның жұмыс барысымен танысу үшін өңірдегі ауылшаруашылығы саласының мұғалімдері бас қосты.
Әдетте, жас мамандарды іс-тәжірибеден өткізу үшін оқу орнының басшылығы жұмысы ілгері басып тұрған өндіріс орындарына тәуелді болады. Ресми түрде келісім шартқа отырғанымен де екінші таратаптың көңіліне қарап, студенттер толыққанды практикадан өте алмайтын. Бұл жайттар ендігі жерде Шымкент аграрлық колледжінде білім алып жатқан оқушылар үшін келмеске кетті десек те болады. Себебі дуалды жүйемен білім беру үшін оқу орынына тиесілі өзіндік өндірістік база ашылып отыр. Қазіргі кезде әлемде оқытудың дуылды жүйесі техникалық және кәсіптік мамандар даярлаудың ең тиімді жолдарының бірі болып табылады. Құны 450 миллион теңгені құрайтын өндірістік база Тассай мөлтек ауданында орналасқан. 5 жарым гектар аумақты алып жатқан оқу орталығында ветеренария бөлімінің студенттерін іс-тәжірбиемен қамту үшін ота бөлмелері де жасақталған. Мұнда білім алушылар үй жануарларынан, ақ тышқандардан, қояндардан қан алып, тәжірибеден өткізе алады. Аграрлық колледж базасындағы мына жылыжайдың бір артықшылығы өсімдіктер субстрат әдісімен егілген. Өзіндік талаптары, өзіндік ережелері бар тәсіл. Мәселен, қызанақ отырғызылған орынға келесі жолы қияр егуге болмайды. Облыстық семинарға қатысушы Қазақстан Респубикасы ауылшаруашылығы академиясының академигі, ғылым докторы, профессор Досымбек Сыдық: «облыста жұмысы жүріп тұрған, шаруашылық басшыларына жаңа технологияларды меңгерту үшін осы базада біліктілікті арттыру орталығы ашылса екен» деген ұсынысын білдірді. Ол үшін орталық аумағында 30 адамға арналған жатақхана да салынған. Байқасақ айтылған ұсынысты ұйымдастыру үшін жағдайдың барлығы да қарастырыған секілді мұнда.
Мал шаруашылығынан өзге база аумағында егжегейлі алма бауы, қызынақ, қияр, асқабақ, жүзім, баялы, қауын-қарбыз сынды жеміс-жидектер отырғызылған. Барлығы да тамшылатып суғару әдісімен өсірілуде, әрине. Колледж директоры өзге оқу орындарының басшыларына осында өз студенттерін іс-тәжірибеден өткізуге мүмкіндік бар екендігенен құлаққағыс етті.
Ботагөз Мәдібек
