Оңтүстік Қазақстан облысының әкімі Бейбіт Атамқұловтың кезекті жұмыс сапары сәрсенбі күні қасиетті Түркістан қаласынан басталды. Өңір басшысы алдымен Қ.А.Ясауи кесенесіне барып, тарихи тұлғаның рухына тағзым етті. Түркі жұртына ортақ рухани орда саналатын көне шаһарда облыс басшысы зияратшылар және қол өнер орталықтарының жұмыстарымен, олардың туризмді дамыту бағытындағы бастамаларымен танысты. Көне шаһардың туристік әлеуетін одан әрі дамыту керектігіне көңіл бөлген облыс әкімі қала басшылығына осы бағытта бірқатар нақтылы міндеттер жүктеп, тапсырмалар берді.
Одан әрі облыс әкімі Түркістан қалалық балалар ауруханасымен танысты. Танысу барысында демографиялық өсімі күн санап артып келе жатқан аймақтағы ахуалды жете түсіну үшін №3 облыстық перинатальдық орталығына арнайы барды. Бұдан соң облыс әкімі «Ақ жол» ЖШС мен «Мамлакат» шаруа қожалығының нан өнімдерін шығаратын және шұжық өндіру цехын аралап көрді. Сапар барысында облыс әкімі кейбір БАҚ беттерінде сынға ұшыраған Түркістан қаласының маңында орналасқан индустриялды аймақта болып, онда атқарылып жатқан жұмыстармен жіті танысып, іске асып жатқан жобалар туралы кеңінен мағлұмат алды. Жалпы аумағы 40 га. алып жатқан бұл өндірістік аумақта тоғыз жоба іске асуда. Қазіргі кезде аймақта барлық қажетті инфрақұрылым тартылған. Түркістан қаласына жасаған жұмыс сапары барысында Бейбіт Атамқұлов жоспардан тыс, күтпеген жерден «Қуаныш» базарына барып, әлеуметтік маңызы бар азық-түлік тауарларының бағасын бағамдады. Базардағы азық-түлік тауарларының бағасын зерделеу барысында бағаның негізсіз өсу фактілері анықталмады. Бүгінде Түркістан қаласының әкімдігі әлеуметтік маңызы бар тауарларға бағаны тұрақтандыру жөнінде жеті жұмыс тобын құрған. Жұмыс сапарының соңында Б.Атамқұлов жергілікті ақсақалдармен кездесіп, сұхбаттасты. Олардың батасын алып, Кентау қаласына аттанды. 
Кентауда облыс әкімі трансформатор зауытының жұмысын көріп, оның іргесінде орналасқан индустриалды аймақта іске асып жатқан жобалармен танысты. Зауыт басшылығы облыс әкімімен кездесу барысында ұлттық валютаның еркін айналымға шығарылуы өнімнің бәсекеге қабілеттілігін арттырады деп сендірді. Одан бөлек, зауыт жанынан Политехникалық колледж ашылып, оны бітірген түлектердің барлығы осы кәсіпорында жұмыспен қамтылуда. Бұдан кейін облыс әкімі қаланы жылумен қамтушы «Кентау сервис» коммуналдық кәсіпорнында болып, жылыту маусымына дайындық жұмыстарын қадағалады. Кентауға жасаған жұмыс сапары барысында өңір басшысы Ю.Гагарин атындағы №16 мектеп-лицейінің жаңа оқу жылына дайындығын көріп, қалалық орталық клиникалық ауруханасының бүгінгі ахуалымен танысты. Жұмыс сапары соңында облыс әкімі Кентау қаласының беделді ақсақалдарымен жүздесіп, шаһарды әрі қарай өркендету бағытындағы жаңа міндеттер жөнінде пікір алмасты.
