Дүйсенбіде шағалалы аймақтың басшысы Қамытбек Айтөреев БАҚ өкілдері алдында ауданның 6 айдағы әлеуметтік-экономикалық дамуына тоқталып, жарты жылдың жетістігін баяндады. Белгілі болғандай, жергілікті бюджеттің кіріс бөлігінің 2015 жыл 6 айға жоспары 758,1 млн.теңгені құрап, нақты 785,7 млн. теңге түскен, яғни жоспар 103,6 пайызға орындалған. Есепті мерзімде аудандағы өндіріс кәсіпорындарында 2925,7 млн.теңгенің өнеркәсіп өнімі өндіріліп, өткен жылмен салыстырғанда нақты көлем индексі 102,6 пайызды құрады. Үдемелі индустриалды-инновациялық дамудың мемлекеттік бағдарламасы аясында жалпы құны 525,0 млн.теңгені құрайтын 4 жобаны іске қосу жоспарлануда. Тағы бір жағымды жаңалық, Шардараның өз әуежайы болады. Ол үшін қазынадан қомақты қаржы қаралмақшы. Туризмді дамыту мақсатында тың серпіліс беретін аумағы 110 га құрайтын әуежайды қалыпқа келтірсе бір күнде Шардараның айдын көліне 20-30 мың адам демалуға мүмкіндігі бар.
Шардарада ауыл шаруашылығы саласы бойынша мемлекеттік бағдарламалар өз деңгейінде жүзеге асып келеді. Мал тұқымын асылдандыру бойынша ауданда қой өсірумен айналысатын екі асыл тұқымды шараушылық бар. Сонымен қатар, мал тұқымын асылдандыру бойынша «Сыбаға» бағдарламасы да өз нәтижесін беріп келеді. Биылғы жылдың өзінде 2000 мың бас аналық мал сатып алуға тапсырма берілсе, бүгінде 1380-і орындалыпты. Айта кетерлігі, аудан әлеуетін арттырып отырған кәсіпкерлерге әкімдіктен барынша қолдау көрсетіліп келеді. Ал, ауылдағы ағайынның ең өзекті мәселесі ауыз су мен табиғи газ екені белгілі. Бұл мәселе бойынша осы жылы облыстық бюджеттен 717,145 млн теңге қаралып, 2 нысан құрылысы жүргізіліп жатыр. Нәтижесінде Қызылқұм, Ақ алтын, Егізқұм және Достық елді мекендеріне газ жеткізуші құбыр құрылысы жүзеге асуда. Ал екінші бір нысан, Көксу ауылының орта қысымды газ өткізгішін квартал ішіндегі газ жүйелерінің құрылысы жүргізуге бағытталуда. Нәтижесінде, аудан халқының 84 пайызы ауыз сумен қамтылған.
Шардараның байлығы, қазынасының бірі — балық шаруашылығы. Ауданда аталмыш шаруашылықты қолға алып, кәсібінің нәсібін көріп отырғандардың да саны басым. Бүгінде 5 млрд. 200 млн. су қоймасы бар ауданда 2 балық зауыты бар. Онда өндірілген өнім тек Қазақстан ғана емес, Германия, Израйль, Ресей сынды мемлекеттердің балыққа деген қажеттілігін қамтамасыз етіп отыр.
