Мүмкіндігі шектеулі жандар Лос-Анджелесте өтетін жарысқа аттанды

Қазақстандық 68 атлет арнайы олимпиада ойындарына қатысу үшін Лос-Анджелеске аттанды. Ел командасы спорттың 15 түрінен бақ сынайды. Қазақстандық спортшылар қоржынға 45 медаль салуды көздеп отыр. Қостанайлық Анна Бражникова алғаш рет қазақстандық құрама сапында арнайы олимпиадалық ойындарға қатысады. Бұл жарыс ақыл-ой мүмкіндігі шектеулі жандар арасында өткізіледі. Анна Бражникова, Special Olympics қатысушысы: -Мен өз командаммен бірге өнер көрсетемін. Анам менен бөлек отырады. Мен құрама мен Қазақстанды ұятқа қалдырмас үшін барымды саламын. Татьяна Бражникова, Анна Бражникованың анасы: — Қызымның өзгеріп келе жатқанын түсіндім. Бұл – Даун синдромы. Кейбір белгілері бет келбетінен көрініп тұрады. Ол дәл осындай жарыстардан келгенде көзінде нұр пайда болатындығын байқаймын. Анна қазір 20 жаста. Ол мектепті бітіріп, бүгінде кондитер-аспазшы мамандығы бойынша білім алуда. Лос-Анджелесте оны командасымен бірге белгілі спортшылар және кино жұлдыздармен кездесу күтіп тұр. Сонымен қатар суда жүзу, волейбол, гольф, үстел теннисі және баскетбол сияқты спорттың 15 түрінен жарысқа қатысады. Қазақстандық спортшылар 15 алтын, 15 күміс және 15 қола медаль алып қайтуды жоспарлап отыр. Ольга Бахарева, Special Olympics Kazakstan бас директоры: — Олар үйлеріне басқаша көзқараспен қайтады. Медаль алып, өздерін бақытты сезінеді. Олар да спорт жұлдыздарына ұқсағысы келеді, оларға еліктейді. Қазір Қазақстанда он мыңнан астам адамның ақыл-ой мүмкіндігі шектеулі. 60-жылдары құрылған Special Olympics қозғалысы соның бестен бір бөлігін ғана қамтиды екен. Сондықтан бұл бағыттағы жұмыстар жандандыруды талап етеді. Авторлары: Руслан Бақытбекұлы, Галина Полевая, Айдар Абдешев