Шымкентте 2021 жылдың алғашқы сенбілігі өтті

    Шымкент қаласында 2021 жылғы алғашқы жалпыхалықтық сенбілік ұйымдастырылды. Аталмыш іс-шараға әкімдік аппаратының қызметкерлерімен қатар, жауапты сала мамандары да тартылды. Дәстүрлі түрде жүргізілетін бұл игі іс-шара мемлекет және қоғам қайраткері Асанбай Асқаров атындағы Дендросаябақта да өз жалғасын тапты.     Сенбі күні сенбілікке жиналған жандар саялы бақта саф ауамен тыныстап, екі қолға күректі алып, тазалау жұмыстарына белсенді түрде кірісіп кетті. Жасы бар, үлкені бар, бәрі біріге отырып, табиғаттың тамылжыған тамаша тартуының аясында біршама жұмыстар атқарды. Айталық, саябақ аумағын күзгі жапырақтардан тазартып, жасыл желектің шырайын жандандыра түсті.    «Шымкент қаласының одан әрмен гүлденуіне бірге атсалысайық! Қала әкімінің бірінші орынбасары осылай деп, қала тұрғындарына қаламызды таза ұстауға, сенбілік жұмыстарында белсенді болуға болуға шақырды.
Адамзаттың табиғатсыз күні жоқ, мұны айтуға табиғаттың тілі жоқ. Осылай деп жырлаған мұзбалақ ақын Мұқағали айтқандай, табиғаттың тебірентіп әкетер тұстары жетерлік. Бірақ, бағалай білгенге әрине. Ендеше, адамзат пен табиғат – егіз ұғым екендігін естен шығармайық. Шымкентті таза әрі әдемі қала етуге сіз де атсалыңыз! Айғақ-ақпарат