«Елу жылда ел жаңа» — дейді дана халқымыз. Бірақ қабырғасының қаланғанына 80 жылдан асып, тозығы жеткен Леңгір қаласындағы №6 жалпы орта мектебінің ғимараты әлі күнге дейін жаңармай тұр. Қабырғалары шытынап, еңсесі түскен ескі ұяда 395 шәкірт тәрбиенің тәртібіне шомып, ұстаздан үлгі, болашағына бағдар алады.
Кешегі бала шәкірт болған бүгінгі ел ағалары қазірде немерелерін осы қабырғасы қисайған білім ұясына жетектеп жүр. Шатыры шайқалып, едені қырық жамау болған мектепке баласын бергісі келмегенімен, оқу ордасының білім жүйесі ұнайды. Тозығы жеткен мекеменің акт залы жабылып, баланың денсаулығына жауапты медициналық пункттің жағдайы санитарлық-гигиеналық талаптарға жауап беруден қалған. Біліммен қаруланатын заманда тиімді білім алатын орынның болмауына кім жауапты? Мектептерді заманауи жабдықтармен толтырмай тұрып, алдымен білім ордасының іргесін қалап алған жөн болар. Баласының болашағына алаңдаған ата-ана 2018 жылда сызылған жаңа мектептің дайын жобасын арқалап талай есікті қақты. Шырылдайтын себеп те бар. Осы жылдың қыркүйегіне дейін бұл жоба қолға алынбаса, құрылыс құжатының сметасына жұмсалған 10 млн-дай қаражатауаға ұшайын деп тұр.
Мектеп ғимаратына қатысты жергілікті жұрттың шағымын ескерген «Nur Otan» партиясы бесжылдық дамудың «Білім беру сапасын арттыру» бағдарламасы бойынша биыл Леңгір қаласындағы №6 мектепке 200 орынға арналған құрылыс жұмыстарын жүргізу назарға алынған. Үкілеген үмітімен заманауи білім ұясының бой көтеруін сарғая күтіп отырғандар осы шаруаның ертерек жүзеге асқандығын қалайды.
aigak.kz
