Түркістан қаласы жасыл желекке айналады

Түркістан облысы табиғаты әсем, ғажайып орындарға бай өлке. Осындай ғажап табиғатты қорғау, өсімін молайту, қадағалау шараларын жүргізу облыстың табиғи ресурстар және табиғат пайдалануды реттеу басқармасына жүктелген. Айталық орман қоры жерлері бойынша аймақтағы орман шаруашылығы мекемелеріне 3 млн 131 мың гектар орман қоры жерлері бекітіліп берілген. Оның ішінде орманмен көмкерілген алқабы 1 млн 615 мың гектарды құрайды. Ағымдағы жылы орманды молайту шаралары бойынша 1010 гектар жерге мәдени орман екпелерін (оның ішінде сексеуіл-900 га) егу мен 10 500 гектар жерге сексеуіл тұқымын себу жұмыстарын жүргізу жоспарланып, бүгінде жерлері дайындалған. Бұл тұрғыда орман екпелерін күтіп-баптау, толықтыру, орманның табиғи ұрпақтануына ықпал жасау, орманды өрттен қорғау және орман тұқымбақтарын дамыту шаралары тұрақты атқарылып келеді. Бұл туралы Түркістан облыстық табиғи ресурстар және табиғат пайдалануды реттеу басқармасы басшысының орынбасары Данияр Сейітов баспасөз жиынында баяндады. Оның айтуынша табиғат аясында браконьерлермен рұқсатсыз ағаш кесіп, аң аулау, т.б заңсыздықтарға бару оқиғалары кесдесесіп жатады.
Осындай сұғанақтықтың (браконьерство) алдын алу мақсатында орман күзеті қызметкерлерімен 993 рейдтік іс-шаралар ұйымдастырылып, 355 заң бұзушылық фактілері анықталған. Заң бұзушыларға 4 млн 629,4 мың теңге әкімшілік айыппұл салынып, оның 4 млн 604 мың теңгесі өндірілген. Табиғатқа келтірілген 3 млн 43 мың теңге залалды өндіру бойынша талап қойылып, оның 2 млн 375 мың теңгесі өндірілген. Бүгінгі таңда балық шаруашылығы мен аңшылық туризімін дамыту басты мақсаттардың бірі.
Облыс аумағында жергілікті маңызы бар балық шаруашылығы су айдындарының саны 2019 жылы 76 болса, 2020 жылы бұл көрсеткіш 134-ке жеткен. Ал, аңшылық алқаптардың саны 2019 жылы 25 болса, 2020 жылы 28-ге жетіп отыр. Сонымен бірге аймақта жасыл белдеу құру бойынша Түркістан қаласының экологиялық ахуалын жақсарту және экологиялық мәдениетті қалыптастыру бағыты басты назарда. Сондықтан облыс әкімінің бастамасымен Түркістан қаласы бас жоспарының жобасына сәйкес, қала айналасынан 7 700 гектар аумаққа жасыл белдеу құру жоспарланған. 2019 жылы 2300 гектар жер игеріліп, 1 млн түптен астам көшет егілген. Ағымдағы жылы 2400 гектар жерді игеру жоспарланып, жыл басынан бері қала айналасына 1234 гектар жерге 769 мың түп және жасыл белдеуді қажетті көшеттермен қамтамасыз ету мақсатында құрылған 300 гектар орман тұқымбағына 1 миллионнан аса әр түрлі көшеттер егілген. Облыс әкімінің тапсырмасына сәйкес, жыл соңына дейін жоспардағы 2400 гектардың қалған 1166 гектарына тағы 1 млн әр түрлі көшеттер егу жұмыстары жүргізілуде.
Бүгінде егілген көшеттерді күтіп-баптау, қорғау және өсімін молайту жұмыстары тұрақты жалғасын тауып келеді.