Өзі іргетасын қалап кеткен оқу ордасының алдына тұрғызылған бұл ескерткіштің рөлі зор. Өйткені ғұмырының соңына дейін білім саласында тер төгіп, еңбек еткен азамат Халықтар достығы университетінің іргетасын қалап, бұғанасын қатайтқан. Лайықты азаматқа лайықты орыннан ескерткіш бұйырғаны көпшілікті қуантты. 
Әбдімұса Қуатбеков атындағы Халықтар Достығы университеті Шымкент қаласында аты ілтипатпен аталатын жоғары оқу орындарының бірі. Осы жоғары оқу орнының президенті болған Әбдімұса Мұратұлы білім беруді дамытуға, өндірістің барлық салалары үшін жоғары білікті және бәсекеге қабілетті мамандар даярлауда аянбай еңбек етті. Университеттің негізін қалаушы, химия ғылымдарының докторы, профессор Әбдімұса Қуатбековтың шыққан шыңы биік. Бүгін арда азаматқа арнап оқу ордасының алдына ескерткіш ашылды. Ашылуға келген көптің қарасы қалың. Өйткені өмірін білім, ғылыммен өрнектеген ұлағатты ұстазды жақын туыстары мен әріптестері сағынышпен еске алып, жылы сөздер мен жақсы тілектерін аямады. Әрбір сахна төріне келген азамат Әбдімұса Қуатбековтың еңбек жолындағы жарқын белестерін тілге тиек етті.
Оңтүстік өңірі Әбдімұса Қуатбековтың отбасын «Академиктер отбасы» деп те атап кеткен. Ұлықты ұлы Нұрлан Қуатбековпен қатар, Рабиға және Роза атты қыздары да әке жолын жалғастырып келеді. Әбдімұса Мұратұлының 21 ғасырдың әлем ғылымына қосқан үлесі үшін алған медалі де және өзге атақ -марапаттары үлкен белестерге жол сілтейді. Қуатбеков талай шәкіртті қуаттандырып, қанатын қатайтқан. Осындай жанның қолпаштауында сапалы білім алған ұл-қыздары, шәкірттері Әбдімұса Қуатбеков туралы тек жақсы естеліктерді жанына түйген.
Салтанатты шараның ашылу рәсімінде сөз алған Түркістан облыстық мәслихаттың депутаттары Саттар Қуашбай мен Дулат Әбіш өнегелі ғұмыр жолында талай шәкірттің ұстамды ұстазына айналған Әбдімұса Қуатбековтің ұрпақ ұлағаты жолындағы ілкімді істері туралы кеңінен айтып берді. Иә, қашанда Арыстағы балалар үйі тәрбиеленушілерінің ет жақынына айналып, үнемі жанынан табылатын арда азаматтың есімі мәңгілік өшпейді. Ата-ананың қамқорлығынсыз қалған қамкөңіл жандарды тәрбиесіне баулып қана қоймай, жоғары білім алуына көп жәрдемтесті. Көрген жұрт Әбдімұса Мұратұлын ағасы әрі әкесі санайтын. Саналы шәкірт тәрбиелей білген тұлғаның өнеге ісі өзгеге үлгі.
