Бүгін қала тұрғындары үшін азық-түлік жәрмеңкесі ұйымдастырылды. Мұнда жергілікті өндіруші кәсіпорындарының өнімдері арзандатылған бағада сатылуда. Дәстүрлі түрде әр аптаның сенбісінде өтіп келген игі шара қала күніне орай 24 қыркүйекке дейін Қажымұқан орталық стадионында өз жалғасын табатын болады.
Мұнда таң сәріден сауда қызу үстінде. Жәрменкенің басталатынын естіген тұрғындар асыға келіп жатыр. Өйткені мұнда күнделікті тұрмысқа қажетті тауарлардың барлығы бар, сонымен қатар базар бағасынан 15 пайыз төмен ұсынылуда. Жәрменкеде көкөніс пен жеміс жидек өнімдерін алушылардың қатары қалың болды. Мәселен көкөністердің бірі саналатын қиярдың бағасы 130 тенге, ал қызанақ 120 тенгеден сатылуда. Және қай кезде болмасын сұранысқа ие ет өнімдері қолжетімді бағада.
Қала күніне орай ұйымдастырылып отырған бұл шара саудагерлердің де тұтынушылардың да көңілдерінен шығуда. Тұрғындардың көпшілігі бағасының қолжетімділігін айтса, шаруа қожалары саудасының қарқынды жүріп жатқанына дән риза. Айта кетейік, жәрмеңке 8 күн бойына жалғаспақ. Сондықтан, Қажымұқан атындағы орталық стадионында сағат таңғы 7-ден түскі 13-00- ге дейін саудагерлер арзандатылған бағада өз өнімдерін ұсынатын болады.
Айзада Бидан
