Шымкентте педагог кадрларды жұмысқа қабылдаудың жаңа жүйесі енгізілді. Білім ұйымдарының қызметкерлерін жұмысқа қабылдау бойынша «HR-Process» бұл мәселені түбегейлі шешпек. Яғни, білім саласының кадрларын іріктеудің автоматтандырылған ақпараттық-талдау жүйесі электронды нұсқаулықтар арқылы жүзеге асырылады. Шымкент қаласы білім бөлімінің басшысы Жанат Тәжиеваның мәліметінше, «HR-Process» жүйесі педагогикалық бос орынға өтініш беру және өңдеу барысын автоматтандыруға, үміткерлер мен бос орындардың деректер қорын құруға, сонымен қатар, заманауи ақпараттық технологияларды қолдану негізінде педагогикалық құрамды іріктеу процесінің тиімділігін арттыруға арналған.
Еске сала кетейік, осы үлгідегі «T-hunter» аталатын мұғалімдерді жұмысқа электронды түрде қабылдау жүйесі елімізде алғаш болып Шымкентте енгізіліп, 2 жыл бойы жемісті жұмыс жүргізіп еді. Бірақ, өз жұмысын тоқтатқан болатын. 1 жылға жуық уақыт орны бос тұрған Шымкент қаласының білім бөліміне басшылық қызметке қайта келген бас ұстаз Жанат Арысбекқызы өзгеріске ұшыраған жүйенің тиімділігін тағы да дәлелдеп, «HR-Process» арқылы жұмысқа қабылдау — сыбайлас жемқорлыққа жол бермеудің бірден бір жолы екендігін айқындап берді. Педагогикалық құрамды іріктеуді автоматтандырудың мақсаты мен артықшылығы үміткерді таңдауда меритократия, жариялық және айқындық қағидаларын сақтауды назарға алады.
Жүйе конкурстық әдіске негізделеді. Педагогикалық қызметке үздік кадрларды іріктеп алуға мүмкіндік береді. Жемқорлықтың алдын алады.
Арнайы комиссия құрамына білім ұйымының директоры, пән мұғалімдері, психолог кіреді. Әлеуметтік желілерде конкурстық комиссия отырысының онлайн трансляциясын көріп отыруға мүмкіндік бар. Жазылым 50 күн бойы youtube желісінде сақталып тұратын болады.
aigak.kz
