Мақтааралдық полицейлер 1000-ға жуық нысанды тексеріп, карантин талаптарын сақтамағандарды анықтады, – деп хабарлайды Polisia.kz.
Одан бөлек, аудандық полицейлер тұрғындардың белгіленбеген орындарда суға түсуіне тыйым салып, қауіпсіздік шараларын ескертуде. Осы бағытта жүргізілген тексеру жұмыстары аясында ҚР ӘҚБтК-нің 364-бабы “Жалпы су пайдалану ережелерін бұзу” бойынша 431 жайт тіркеліп, оларға әкімшілік хаттама толтырылды. Сондықтан облыс тұрғындары барынша түсіністік танытып, тәртіпке бағынып, карантин режимін бұзбауға шақырамыз.
Мақтаарал АПБ-нің полиция қызметкерлері және басқа да мүдделі орган өкілдерінен тұратын мобильді топ карантиндік шараларды бақылап, басқа да құқықбұзушылықтардың болдырмау мақсатында алдын алу және тексеру жұмыстарын жүргізуде. Тәртіп сақшылары рейдтік іс-шаралар барысында 1000-ға жуық нысанды тексеріп, карантиндік режим талаптарының бұзылуын анықтады. Мәселен, Мақтаарал ауданы аумағында полицейлер бүгінгі күнге дейін ҚР ӘҚБтК-нің 425-бабы “Халықтың санитарлық-эпидемиологиялық салауаттылығы саласындағы заңнама талаптарының, сондай-ақ гигиеналық нормативтердің бұзылуы” бойынша карантин талаптарын өрескел бұзған 124 адамды анықтап, әкімшілік хаттама толтырды. Осы жайттарға байланысты жинақталған іс-құжаттары тиісті шешім қабылдау үшін ҚР Денсаулық сақтау министрлігінің Түркістан облысы бойынша Тауарлар мен қызметтердің сапасы мен қауіпсіздігін бақылау комитетіне жіберілді.
