Түркістан облысының әкімі Өмірзақ Шөкеев Түймебаевтар отбасына көңіл айту жеделхатын жолдады, — деп хабарлайды aigak.kz тілшісі.
«Облыс жұртшылығы ауыр қазаны басынан кешіп отыр.
Ардақты ана, отбасының ұйытқысы бола білген Түймебаева Ұлмекен Жаманқұлқызы 90 жасқа қараған шағында өмірден озды.
Бір әулеттің ғана емес, күллі қазақ жұртшылығының ақылман анасына айналған Ұлмекен Жаманқұлқызының мезгілсіз дүниеден өтуі қабырғамды қайыстырды.
Әрбір азамат үшін жарық дүниеге алып келген ананың орны, қадірі мен қасиетінің ерекше екенін жан жүрегіммен түсінемін.
Ұлмекен Жаманқұлқызы саналы ғұмырын өзгеге үлгі боларлықтай ұрпақ тәрбиелеп, олардың өсіп-өнуіне дәнекер болған батыр ана ретінде есте қалды.
Осы шаңырақтан Мемлекет мүддесі жолында аянбай еңбек еткен ел азаматтарының шығуы Ұлмекен ананың ақ сүтімен келген адамдық пен тәлім-тәрбиесінің жемісі деп білемін.
Осы қазаға байланысты барша қазақ еліне, отбасына, туған-туыстарына қайғырып көңіл айтамын.
Алдағы уақытта отбасыларыңызда тек жақсылықтар болғай», — делінген жеделхат мәтінінде.
Қазақстан халқы Ассамблеясы Төрағасының орынбасары — Хатшылық меңгерушісі Жансейіт Қансейітұлының анасы Ұлмекен Жаманқұлқызы Түймебайкелінінің өмірден өтуіне байланысты отбасы мен жақындарының қайғысына ортақтасып, көңіл айтамыз.
