Жаңа оқу жылында Төлеби ауданында бес мектеп пайдалануға берілді. Нәтижесінде, бір жарым мыңға жуық оқушы жаңа ғимаратта білім алатын болады. Соның бірі ауданға қарасты Кемеқалаған ауылдық округінде лентасы қиылған екі білім ошағы. Салтанатты шараға аудан әкімі Бұхарбай Парманов, облыстық мәслихаттың депутаттары мен ауыл қариялары арнайы қатысты. Бұл күні алдыңғы толқын ақ батасын беріп, жас буынның болашағы жарқын болсын деген жүрекжарды тілектерін жеткізді.
Бүгін бір ауылда екі қуаныш! Ақ түйенің қарны жарылған күн десе де болады. Көптен күткен екі мектеп білім күні қарсаңында балалар игілігіне берілді. Атаулы күннің басы-қасында болу үшін аудан әкімі Бұхарбай Парманов пен облыстық мәслихаттың депутаттары Дулат Әбіш, Әсет Қайыпбековтер келді арнайы. Алғашқы болып Абай ауылындағы Қазығұрт жалпы орта мектебінің лентасы қиылды. Жаңа оқу жылына білім ошағы ашылмай қалады ма деген көптің күдігі осылайша сейілді. 2014 жылдың желтоқсанында басталған нысанның құрылысы әупірімдеп 2016 жылы аяқталды. Құрылыстың жалпы соммасы — 369 млн.теңгені құраған. Қаржыландыру көзі — облыстық бюджет.
Бұл күні балалар қуанышында шек болмады. Осыған дейін Абай мектебінде оқып келген оқушылар өз еншісін алып, замануи үлгідегі мектепке ауысты. Сонымен қатар, іргесі 1972 жылы салынған 60 орындық Қазығұрт бастауыш мектебінде оқып келген балғындар да жаңа мектепке көшіп отыр. Өз кезегінде ауыл тұрғындарының қуанышына ортақтаса келген мәслихат депутаты Дулат Назарбекұлы оқушыларды білім күнімен құттықтап, мектепке құнды кітаптар сыйлады.
Құрылыс жұмыстарын жүрігізген компания салтанатты түрде мектептің кілтін табыс етті. Ала-жаздай құрылыстың басы қасында жүріп, кем-кетігін түгендеген облыстық мәслихаттың депутаты Әсет Қайыпбековке алғысын білдірді. Қариялар ақ батасын берді, дүркіретіп лента қиылды. Бұл көрініске көңілі семірген ауыл тұрғындары су жаңа мектепке қазақтың дәстүрімен шашу шашты.
Абай ауылының іргесінде жатқан Әңгір ата ауылында да мереке бүгін. 1934 жылы салынған 80 орындық Әңгір ата бастауыш мектебі 150 орындық орта мектепке ауысып, жаңа ғимарат бой көтерді. Халық қалаулысы Дулат Әбіш жаңа білім ордасына да кітаптар табыс етті. Енді мына даңғарадай білім ұясынан ғалымдар, әкімдер болашақ ел басқаратын көзі ашық, көкірегі ояу азаматтар көптеп шықсын деген тілектер айтылды. Екі қабатты замануи білім ошағының табалдырығын 306 оқушы аттады. Жас жеткіншектерге екі ауысымда 32 ұстаз білім беретін болады. Облыстық қазынаның 342 млн.теңгесіне бой көтерген нысан соңғы замануи материалдық базамен толыққан. Жиырма бірінші ғасырдың білім саласындағы жетістігі жырақтағы ауылға жеткеніне оқушылар қуанып отыр. Жалпы Төлеби ауданында 68 мектеп жұмыс жасайды. Бір ауысымда-21 мектеп, екі ауысымдағысы – 47, үш ауысымдағы және апатты жағдайдағы білім ошақтарының санын жойған аудан. Мұның барлығы облыс басшыларымен Президенттің пәрмені арқасында дейді ел ағалары.
Осылайша білім күні Төлебидің туы желбіреді. Бір емес ауданда бес мектеп есігін айқара ашып, 1383 оқушыны құшағына сыйғызды. Ал 2888 бала биыл бірінші сыныптың табылдырығын аттаған. Мемлекет басшысының тапсырмасымен Ел Тәуелсіздігінің 25 жылдығына жамағатқа тарту болған қадірлі сый — енді елді ұзағынан сүйіндірсін деп тілейік!
Гүлжан Нұрланқызы
