Түркістан облысында «Nur Otan» партиясы қолға алған «Біз біргеміз!» акциясы жалғасуда. Корнавирусқа қарсы күресті күшейту, көмекке аса мұқтаж тұрғындардың әл-ауқатын көтеру мақсатындағы акцияға өңірдегі кәсіпкерлер, мәслихат депутаттары мен меценаттар атсалысып жатыр. Азаматтық пен жомарттық сынға түскен кезеңде белгілі кәсіпкер, меценат Рәшкүл Оспанәлиева «Түркістан» әлеуметтік-корпоративтік даму қорына 25 млн. теңге аударып, айрықша жанашырлық танытты, — деп хабарлайды «Nur Otan» партиясы Түркістан облыстық филиалының баспасөз қызметі.
«Береке-А» корпорациясының басшысы Рәшкүл Оспанәлиева бұған дейін де қайырымды істерімен танылып жүрген жан.
«Мемлекет тарапынан індетті таратпау, елдің денсаулығы мен қауіпсіздігін сақтау мақсатында кешенді жұмыстар атқарылып жатыр. Бұл қиын сәтте елдің әрбір азаматы қоғамға қолдан келген көмегін көрсетуі тиіс деп есептеймін. Қауіпсіздік ережелерін сақтап, сабыр сақтай білсек, бұл қиындықтан да шығамыз», – дейді кәсіпкер.
«Біз біргеміз!» акциясы бойынша Түркістан облысының аудан, қалаларында 1600-ден астам отбасыға азық-түлік, гигиеналық және медициналық заттар таратылды. Бұл міндетті орындауға «Nur Otan» партиясы филиалдарының өкілдері, «жасотандықтар» және еріктілер тартылған.
