Алматы, Түркістан және Жамбыл облыстарында жолшылар шұңқырларды жамау және жолдарды таңбалау жұмыстарына кірісіп кетті,-деп хабарлайды ҚР ИИДМ Баспасөз қызметі.
Алматы облысында бүгінгі таңда «Алматы – Нұр-Сұлтан» автомобиль жолының 45-59 шақырымында, «Алматы – Бішкек» жолының 25-27 шақырымында шұңқырларды жамау жұмыстары басталды. Жөндеумен қамтылған жолдардың жалпы ауданы 80 мың шаршы метрді құрайды. Аталмыш жұмыстар екі ай ішінде аяқталады деп жоспарлануда. Шараларға мамандандырылған техниканың 7 бірлігі мен 20-дан астам маман жұмылдырылған. Сондай-ақ, мұнда жолдардың қозғалыс бөлігін таңбалау, жарықтарды жою жұмыстары басталды.
Түркістан облысында «Жизақ – Гагарин – Жетісай – Асықата – Сарыағаш – Жібек жолы» жолында шұңқырларды жамау жұмыстары жүргізілді. Бұдан бөлек, жолдың қозғалыс бөлігін таңбалау, жол белгілерін орнату жұмыстары аяқталған.
