Бүгін COVID-19 коронавирустың таралуына қарсы шұғыл әрекет ететін қала әкімдігінде құрылған штаб мүшелері қаламыздағы медициналық заттарды шығаратын кәсіпорындардың жұмысымен танысты, — деп хабарлайды Шымкент қалалық мәслихатының баспасөз қызметі.
Бүгінде қала аумағындағы киім тігетін фабрикалар шұғыл түрде дезинфекциялық заттар шығаратын кәсіпорынға айналды. Қала мәслихатының хатшысы Ғани Ташқараев, депутат Ермек Дәрменов пен «Атамекен» кәсіпкерлер палатасының директоры Нұрлан Қабыштаев режимдік жұмыс барысында тез арада бетперде мен дизинфекциялық заттар шығаратын бес кәсіпорынды аралап, қолдау қажет етіп отырған мекемелердің қаржы немесе құжат рәсімдеу мәселелерінің шешу жолдарын қарастырды.
Қазіргі таңда «Оңтүстік» арнайы экономикалық аймағында орналасқан «АГФ групп» ЖШС кәсіпорны күніне 5000 жуық антиаллергенді маскаларды тігіп, тұрғындарды бетперделермен қамтуды қолға алды. «Экофарм» ЖШС-і 1,5 млн медициналық маскаға жететін шикізатпен қамтамасыз етуге дайын екенін айтса, «ALATEX» фабрикасы 70 жуық жұмысшыны іске қосып, күніне 100 мыңға дейін маска тігіп шығаруға күш қуаты жететінін жеткізді.
Сондай-ақ, антисептик шығаратын кәсіпорын да өз өнімдерінің мөлшерін арттырып жатыр. Бүгін — ертең дәріханаларға түсетін көпреттік маскалардың қолжетімділігі мен бағасы бақылауға алынады.
