ҚР Премьер-Министрі Асқар Маминнің төрағалығымен өткен Үкімет отырысында Қазақстанда коронавирус инфекциясының таралуына жол бермеу шаралары туралы денсаулық сақтау министрі Е. Біртанов пен сыртқы істер министрі М. Тілеуберді, индустрия және инфрақұрылымдық даму министрінің орынбасары Б. Қамалиев, Премьер-Министрдің орынбасары Е. Тоғжанов баяндады, — деп хабарлайды primeminister.kz.
ҚР денсаулық сақтау министрі Елжан Біртаеов қазіргі таңда әлемде COVID-19 пневмониясымен 88 571 адам тіркелгенін және оның 1951-ы соңғы тәулік ішінде орын алғанын хабарлады. Күн сайынғы өсім қарқыны 2,25%-ды құрады.
Соның ішінде Қытай Халық Республикасында 80 174 адам ауруға шалдығып, 206-ы соңғы тәулік ішінде тіркелді (күн сайынғы өсім – 0,25%), 44 518 адам жазылып шықты (55%). Стационарларда әлі де 32 741 науқас ем алуда.
Бүгінгі таңда Қытайдан тыс елдерде 8 397 адамда коронавирустық инфекция расталды. Науқастардың көбі Оңтүстік Корея, Италия, Иран, Жапония елдерінде тіркелген және орта тәуліктік өсу қарқыны 30%-ды құрады.
«Денсаулық сақтау министрлігі осы жылдың 6 қаңтарынан бастап Қазақстан Республикасында коронавирустық инфекцияның (КВИ) әкелінуі мен таралуының алдын алу бойынша күшейтудің үш кезеңін іске асырды», — деді денсаулық сақтау министрі.
Бірінші кезеңде Қазақстан Республикасының бас мемлекеттік санитарлық дәрігерінің қаулысымен мемлекеттік шекара арқылы өткізу пункттерінде санитарлық-эпидемиологиялық бақылау күшейтіліп, арнайы жаттығулар өткізілді. Бұдан өзге, ҚХР-дан келген адамдарға медициналық мониторинг қамтамасыз етілді. Жеке қорғану, сырқаттың алдын алу және емдеу құралдарының қажетті қорлары қалыптастырылды. Сонымен қатар халық арасында ақпараттық-түсіндіру жұмыстары басталды.
31 қаңтардан бастап күшейтудің 2-кезеңі басталды. Денсаулық сақтау министрлігінің бұйрығына сәйкес:
-
барлық шекаралардағы санитарлық-карантиндік пункттерге қосымша 150 санитарлық-эпидемиологиялық қызмет маманы жіберілді;
-
жаңа инфекцияның зертханалық диагностикасы реттелді;
-
клиникалық емдеу хаттамасы және эпидемияға қарсы іс-шаралар алгоритмдері бекітілді.
20 ақпаннан бастап Министрлік инфекцияның әкелінуі мен таралуының алдын алу бойынша күшейтудің 3-кезеңін іске қосты.
«Коронавирустық инфекцияның таралу қаупінің деңгейіне байланысты елдерді үш санатқа саралау бойынша әдістеме әзірленіп, енгізілді. Қауіп деңгейіне байланысты, коронавирустық инфекция таралған елдерден келген адамдарға тиісті медициналық мониторинг орнатылды», — деді Е. Біртанов.
Тәулік бойы басқа мемлекеттердегі қауіп деңгейі бағалануда. Бақылау КВИ тіркелген жағдайлардың саны, аурушаңдық деңгейі, вирустың таралу қарқыны секілді бірқатар критерийлерден тұрады.
Биылғы 1 наурыздан бастап Министрлік күшейтудің төртінші сатысын енгізді. ҚР Бас мемлекеттік санитарлық дәрігерінің қаулысымен бірінші санаттағы елдер қатарына Қытай Халық Республикасымен қатар, Иран, Оңтүстік Корея, Жапония, Италия, Гонконг (ҚХР), Тайвань (ҚХР) және Макао (ҚХР) жатқызылды.
«ҚХР мен Ираннан келген азаматтар міндетті түрде 14 күндік карантинге жатқызылады және ауруханадан шыққаннан кейін қосымша 10 күн ішінде медициналық бақылауда болады», — деді денсаулық сақтау министрі.
Бірінші санаттағы қалған елдерден келген (Оңтүстік Корея, Жапония, Италия, Гонконг (ҚХР), Тайвань (ҚХР) және Макао) азаматтар 14 күнге тұрғылықты жері бойынша карантинге орналастырылады. Бірақ санитарлық қызметтің шешімі бойынша бұл адамдар медициналық ұйымдағы карантинге ауыстырылуы мүмкін.
Екінші санаттағы елдерден келген азаматтар 14 күн ішінде тұрғын жері бойынша медициналық бақылауда болады және қосымша 10 күн бойы қоңырау шалу арқылы қашықтықтан бақылау астында болады.
Үшінші санаттағы елдерден келген азаматтар 24 күн ішінде қоңырау шалу әдісімен қашықтан бақыланады.
Жергілікті атқарушы органдар сырттан келген барлық азаматарға мұқият мониторингті қамтамасыз етуі қажет.
Сонымен қатар, Мемлекет басшысының азаматтардың денсаулығын қорғау мақсатында түбегейлі шаралар қабылдау тапсырмасын іске асыру мақсатында Денсаулық сақтау министрлігі басқа мемлекеттік органдармен бірлесе отырып, Қазақстан Республикасында коронавирустық инфекция анықталып, таралған кездегі іс-қимыл алгоритмін әзірледі («Б жоспары»).
2020 жылдың 6 қаңтарынан бастап Денсаулық сақтау министрлігі мемлекеттік шекарадан өткізу пункттерінде санитарлық бақылауды күшейтіп, миллионнан астам адамды тексеріп қарады.
Бақылауға 30 мыңнан астам адам алынды. Бүгінгі күні инкубациялық кезеңнің аяқталуына байланысты бақылаудан азаматтардың негізгі бөлігі шығарылды. 6 474 адам әлі де медициналық бақылау үстінде.
«6 қаңтардан бастап қазіргі уақытқа дейін дене қызуы көтеріліп, жедел респираторлық вирус инфекциясымен ауырған 186 адам ауруханаға жатқызылды, олардың 166-і жазылып шықты. Қалған 20 адам стационарда ем алуда. Коронавирустық инфекция диагнозы расталмады, зертханалық зерттеу нәтижелері теріс», — деді Е. Біртанов.
Сырқаттардан алынған сынамалар Ресей, Қытай және отандық өндірістің тест-жүйелерімен зерттелді. Барлық тестілер Дүниежүзілің Денсаулық Сақтау Ұйымымен валидацияланды.
Қазіргі таңда барлығы 967 адам зертханалық тексеруден өтті, оның ішінде 544 адам Қытай Халық Республикасы (Пекин және Ухань) мен Жапониядан (Токио) келді, 423 адам коронавирус немесе науқастармен байланыста болды күдігімен ауруханаға жатқызылды.
Үкімет резервінен қаражат бөлінді. Коронавирустық инфекция анықталған жағдайда және коронавирус таралған елдерден келген адамдарды карантинге орналастыру мақсатында медициналық ұйымдардың дайындығы қамтамасыз етілді. Тест-жүйелердің, дәрілік заттар мен медициналық бұйымдардың, сондай-ақ жеке қорғану құралдарының қорлары жасалды.
ҚР сыртқы істер министрі Мұхтар Тілеуберді өз кезегінде Сыртқы істер министрлігі жедел шараларды қабылдау мақсатында коронавирустық инфекцияның таралуына қатысты ахуалды ерекше бақылауда ұстап отырғанын айтты.
Мәселен, коронавирус инфекциясының таралуы бойынша эпидемиологиялық қаупі жоғары елдердегі шетелдік мекемелерімізде жедел штабтар құрылды, біздің азаматтарды эвакуациялау бойынша іс-әрекеттер алгоритмдері қабылданды және консультациялар беру мақсатында «жедел желілер» ашылды.
Бүгінгі таңда Қытайдан 480 қазақстандық эвакуацияланды. Қытаймен тұрақты әуерейстері, жаяу жүру бекеттері, темір жол/автомобиль жолаушы тасымалы тоқтатылды. 2020 жылғы 3 ақпаннан бастап Қытайдағы барлық шетелдік азаматтарға виза беру тоқтатылды.
Биылғы 5 наурыздан бастап Әзербайжанмен әуе рейстері қысқарады және Иран азаматтарының Қазақстанға кіруіне тыйым салынады.
«Біздің азаматтарға эпидемиологиялық қаупі жоғары елдерге сапар шегуден қалыс қалу ұсынылды», — деді М. Тілеуберді.
Қолда бар мәліметтер бойынша, аталған елдерде 95 мыңнан астам азаматтарымыз бар, оның ішінде 35 мыңы Кореяда, 40 мыңы – Америка Құрама Шттатарында, 5100 – Біріккен Араб Әмірліктерінде, 5000 – Германияда, 3000 – Ұлыбританияда, 1800 – Италияда, 1000 – Францияда. Олардың басым бөлігі — студенттер, еңбек мигранттары, шетелдегі мекемелердің қызметкерлері және олардың отбасы мүшелері, туристер мен бизнесмендер.
«Эпидемиологиялық ахуал ушыққан жағдайда, қазақстандық азаматтарды эвакуациялау мәселесі дер кезінде қарастырылатын болады. Бүгінгі таңда шетелдегі Қазақстан азаматтарының арасында коронавируспен ауырған жағдайлардың тіркелмегенін ерекше атап өткен жөн», — деді сыртқы істер министрі.
Коронавирус инфекциясының таралуы бойынша эпидемиологиялық қаупі жоғары елдердегі ахуалға, сондай-ақ мемлекеттердің коронавирустың таралуына жол бермеу бойынша шектеу шараларына мониторинг және талдау жүргізілуде.
Жасалған талдау көрсетіп отырғандай, шет елдер келесі шектеу шараларын қабылдауда:
-
халықаралық өткізу пункттерінде және әлеуметтік маңызы бар нысандарда санитарлық-карантиндік бақылауды күшейту;
-
қаупі бар елдермен визалық режимді ішінара немесе толық тоқтату, тіпті мемлекеттік шекараны жабу;
-
авиациялық, теміржол және автомобильдік жолаушылар қатынастарын қысқарту және мүлдем тоқтату;
-
уақытша эпидемиологиялық орталықтар және госпитальдар салу;
-
қоғамдық-бұқаралық және халықаралық іс-шараларды тоқтату.
«Сонымен қатар, эпидемияның экономика мен жеке бизнеске теріс әсерін болдырмау бойынша шетелдік мемлекеттер алдын алу шаралар қабылдануда. Министрлік осы бағыттағы жұмысты жалғастырады», — деді М. Тілеуберді.
Индустрия және инфрақұрылымдық даму министрі Б. Қамалиев коронавирустың таралуын алдын алу бойынша көлік саласында қабылданып жатқан бірқатар шаралар туралы айтып берді.
Мәселен, Қазақстан мен Қытай арасындағы барлық тұрақты рейстер (аптасына 34 рейс) 2020 жылғы 3 ақпаннан бастап тоқтатылған.
2020 жылғы 1 наурыздан бастап Нұр-Сұлтан – Сеул және Алматы – Сеул бағыттары бойынша тұрақты рейстердің саны аптасына 9-дан 3-ке дейін қысқарды.
«Mahan Air» әуе компаниясының Алматы – Тегеран бағыты бойынша рейстері биылғы 1 наурыздан бастап тоқтатылды (аптасына 1 рейс). Сондай-ақ осы жылдың 5 наурызынан бастап Нұр-Сұлтан – Баку рейсі тоқтатылады. Алматы – Баку рейсі 5-тен 1 рейске, Ақтау – Баку рейсі 7 рейстен 1 рейске дейін қысқартылды. Нұр-Сұлтан – Токио әуе бағдары 2-ден 1 рейске дейін қысқартылды.
«Аталған рейстердің тоқтатылуына байланысты, билеттері бар жолаушылар ағымдағы жылдың 1 наурыздан бастап жоғарыда көрсетілген рейстерге билет алған орны бойынша айыппұл санкцияларынсыз және толық көлемде қайтара алады», — деді Б. Қамалиев.
