Түркістанда Президенттік кадр резервінің мүшесі басшылық лауазымға тағайындалды

Ағымдағы аптада Президенттік жастар кадр резервінің мүшесі Бекжан Мухидинұлы Әлімкұлов Қазақстан Республикасы Энергетика министрлігі Атомдық және энергетикалық қадағалау мен бақылау комитетінің Түркістан облысы бойынша аумақтық департаментінің басшысы болып тағайындалды, — деп хабарлайды Қазақстан Республикасы Мемлекеттік қызмет істері агенттігінің Түркістан облысы бойынша департаментінің баспасөз қызметі.

Жас кезінен-ақ халық игілігіне қызмет етуге барын салған Бекжан  Әлімкұловтың еңбек жолы «Қазақстан темір жолы» акционерлік қоғамы саласында құқықтық қызмет көрсетуден басталып, еліміздің бас қаласында ірі құрылыс өнеркәсіпорнын ашумен жалғасқан.

Өзі ашқан завод өнімдерімен мемлекетіміздің ең ірі әуе жайында жол төсеген кәсіпкер Бекжан Әлімқұлов, мемлекеттік «Дарын» сыйлығының лауреаты, «Жас Отан жастар қанаты» Қоғамдық Бірлестіктігі орталық кеңесінің мүшесі, Нұр Отан филиалының кәсіпкерлікті қолдау жөніндегі кеңес мүшесі болып табылады.

Бірнеше тілді еркін меңгеріп, Германияның Федералдық экономика және Энергетика министрлігі ұйымдастырған басқарушы кадрларды даярлау бағдарламасы бойынша тағылымдамадан өткен жас басшы өзінің өмірлік кредосын  туған елі үшін жақсылық жасаумен байланыстырады.