Әкім сөз құдыретімен тұрғындарды бітімгерлікке шақырды

247 мыңнан астам халық тұратын Қаратау ауданындағы жұмыстарға көңіліңіз қаншалықты толып жүр? Негізі бес жыл бұрын құрылған аймақ іскерлік орталыққа айналып кетті. Шымкент қаласы әкімшілігінің ғимараты, Ж.Шанин атындағы академиялық қазақ драма театры, Түркістан сарайы, кітапхана тізе берсек жетерлік. Осыдан төрт ай бұрын Қаратауға әкім болып қызметке келген Абзал Әліқұлов аймақты дамыту үшін инвестиция тарта алды ма?

Іскер басшы — ел үшін құт. Әкім халыққа жақын болса дейміз. Бірақ әрдайым солай бола бермейді. Сонымен, Абзал Шымкентбайұлының Қаратау ауданына әкім болғанына төрт айдан асыпты. Осы уақыттың аралығында тұрғындармен жүздесіп, мәселесіне қанық болып үлгерген. Асар мөлтек ауданындағы №89 мектепте өткен есептік жиында әдеттегідей баяндама жасалып, өткен жылдың жұмыстары мәлімделді. Патша көңілді тұрғындар істің мән-жайын біліп алған соң, сұраққа көшті. Аяқсыз қалған жолдарға наразы болып жүрген халық ешкімнің бетіне, беделіне қарамай көңілде жүрген көп ойларын айтып алды.Айтылған сөз атылған оқпен тең. Әкім тұрғындарға уәде беріп, Шымкент қалалық жолаушылар көлігі және автомобиль жолдары басқармасының басшысы Абай Тұрханов үшін жауап берді. Кеше келген басшыларды түсінуге тырысайық дейді. Жарайды. Бірақ жұмсақ креслоны баяғыда жылытып қойған қызметкерлердің бейғам іс-әрекетін қайтсек екен?

Бір ауыз сөзбен адамды бақытты етуге де, көңілін қалдырып, мәңгі жау етуге де болады. 30 жылдық еңбек өтілі бар Әліқұлов сөздің құдыретімен тұрғындарды бітімгерлікке шақырды. Бірі қоғамдық көліктің мәселесін қозғады, бірі сол баяғы жетіспейтін учаскелік полиция қызметкерлерінің жырын айтты. Өте көп сұрақ көтеріліп, микрофонға кезекке тұрғандарды қарияның бәтуалы батасы тоқтатты.

Есептік кездесу аяқталған соң тұрғындар бірден тарқаспады. Көкейінде жүрген сұрақтарын көпшіліктің көзінше қоюға қымсынғандар әкімнің өзімен тікейлей барып сөйлесті. Абзал Шымкентбайұлы барлығына жауап беруге уақыт тауып, мамандарына тапсырма жүктеп жатты. Жиылған жұртқа алғыс айтып, иықтан бір жүкті түсіріп шыққан Әліқұловты бізде сөзге тартып, төрт айда атқарған нақты тірлігін сұрадық.

Экономист-менеджер және заңгер мамандығын игерген әкім қызметке келгенім күні кеше дейді. Ендеше уақыт еншісіне қалдырайық.