Миллионды мегаполисте ҚР Парламенті Сенатының депутаттары қоғамдық кеңес өткізіп, мәслихат депутаттарымен кездесті. Шымкент қалалық мәслихат хатшысы Ғани Ташқараев 2020 жылға қойылған жоспарлармен таныстырып, өткен жылда атқарылған жұмыстар легін тілге тиек етті. Парламент Сенаты төрағасының орынбасары Бектас Бекназаров елімізде 2019 жылы қабылданған заңдарды атап өтті. Өз міндетін заң шығару процесіне жауапты маман деп түсіндірген Бектас Әбдіханұлы ешкімнің жеке құқығын таптамайтын, арын аяқ асты етпейтін, мүмкіндігін шектемейтін, жалпы халыққа қолайлы заң шығару әсте оңай емес және асқан жауапкершілік пен жан-жақтылықты талап ететін маңызды мәселе екендігін айтты. Парламент Сенаты төрағасының орынбасары әлеуметтік сақтандыру, атаулы әлеуметтік көмек қашанда басты назарда, алайда , бұл жылды мемлекет басшысы Қасым Жомарт Тоқаев «Педагог статусын» көтеріп, мәртебесін биіктетуді қолға алуға тапсырғанын жеткізді.
