Бүгінде елімізде спортты дамытуға барлық жағдайдың жасалып жатқаны белгілі. Әсіресе, соңғы 10 жылдың бедерінде мемлекет тарапынан қолдауға ие болып, еліміздің әр түкпірінде спорт нысандары салынып жатыр. Көптеген табысты азаматымыз туған ауылы мен аудандарына қолдау көрсетуде. Олардың жомарттығының, рухани, моральдық, материалдық қолдауларының арқасында елімізде талай игі істер атқарылуда.
Осы орайда Төлеби ауданы Кемеқалған ауылдық округі Ақбастау елді мекенінде орналасқан Алма Тау демалыс аймағында «Alma Tau» спорт академиясы ашылды, деп хабарлайды Төлеби ауданы әкімінің баспасөз қызметі. Академияның ашылу рәсіміне Төлеби ауданының әкімі Бауыржан Омарбеков, облыстық денешынықтыру және спорт басқармасының басшысы Болат Қырықбаев, ауыр атлетика федерациясының атқарушы директоры Алдияр Нуралинов, ел ағасы Орынбай Абдиев, екі дүркін Олимпиада чемпионы, бес дүркін әлем чемпионы Илья Ильин, ауыр атлетикадан Қазақстан Республикасы құрамасының бас бапкері Юрий Мельников, ауыр атлетикадан Қазақстан Республикасының еңбек сіңірген жаттықтырушысы Алексей Ни жаңа спорт ғимаратының тұсауын кесіп, нысанмен танысты.
